Rusiya və ABŞ BKS-in uçuşunu 2030-cu ilin sonunda başa çatdırmaq barədə razılığa gəliblər
Rusiyanın baş nazirinin birinci müavini Denis Manturov və NASA-nın rəhbəri Cared Ayzekman Rusiya ilə ABŞ arasında kosmik sahədə əməkdaşlıq perspektivlərini müzakirə ediblər. Tərəflər Beynəlxalq Kosmik Stansiyanın (BKS) 2030-cu ilin sonunda orbitdən idarə olunan şəkildə çıxarılmasını* nəzərdə tutan birgə proqramı razılaşdırıblar. Oxuməni.az xəbər verir ki, bu barədə "İnterfax" məlumat yayıb.
Baş nazir müavininin katibliyindən bildirilib ki, işçi görüşdə iki ölkə arasında qarşılıqlı fəaliyyətin cari və gələcək istiqamətləri nəzərdən keçirilib. Qurumun nümayəndələri vurğulayıblar ki, "stansiyanın uçuşunun 2030-cu ilin sonunda başa çatdırılmasını nəzərdə tutan birgə proqram hazırlanıb". Çərşənbə axşamı Denis Manturov, Cared Ayzekman və "Roskosmos"un rəhbəri Dmitri Bakanov Baykonur kosmodromuna səfər edərək, beynəlxalq ekipajla "Soyuz MS-29" pilotlu gəmisinin** orbitə uğurla çıxarılmasını izləyiblər.
Daha əvvəl "Energiya" korporasiyasının iyunun 30-na olan illik hesabatında stansiyanın Rusiya seqmentinin fəaliyyətinin 2028-ci ildən sonra uzadılması imkanı qeyd olunmuşdu. Bununla yanaşı, 2025-ci ildə "Roskosmos" və NASA obyektin istismarının başa çatdırılması üçün ümumi strategiyanı müəyyən etmiş, aprelin 7-də isə Rusiya dövlət korporasiyasının baş direktoru stansiyadan 2030-cu ilə qədər istifadə olunması planlarını təsdiqləmişdi.
Qeyd edək ki, iyulun 13-də NASA-nın direktoru Cared Ayzekman Baykonur kosmodromuna gəlib. Bu səfər NASA rəhbərinin son səkkiz ildə Baykonura ilk səfəri olub. "Roskosmos" o zaman bildirmişdi ki, Ayzekman dövlət korporasiyasının baş direktoru Dmitri Bakanovla görüşəcək.
*Orbitdən çıxarma — kosmik obyektin sıx atmosfer qatlarına daxil olması üçün onun trayektoriyasının qəsdən dəyişdirilməsi prosesidir. Bu, stansiyanın təhlükəsiz şəkildə məhv edilməsi üçün zəruridir; bu zaman konstruksiyanın böyük hissəsi yanır, yanmayan fraqmentlər isə okeanın gəmiçilik üçün istifadə olunmayan rayonlarına düşür.
**Pilotlu kosmik gəmi — insanların kosmik fəzaya daşınması və onların Yerə təhlükəsiz qayıtması üçün xüsusi layihələndirilmiş uçuş aparatıdır. Yük gəmilərindən fərqli olaraq, o, həyat təminatı və ekipajın qəza zamanı xilas edilməsi sistemləri ilə təchiz olunub.
Almaz Həsənli
