Starmer Britaniya Baş naziri vəzifəsindən istefa verdiyini açıqladı
Böyük Britaniya Baş naziri Kir Starmer 22 iyun Bazar ertəsi günü istefa verdiyini açıqladı. O, Kralla danışdığını söylədi. Bu barədə Reuters məlumat yayıb.
Starmer qarşıdan gələn seçkilərdə Leyborist Partiyasına rəhbərlik etmək üçün ən yaxşı namizəd olmadığını "ləyaqətlə" etiraf etdiyini söylədi. O, həmçinin istefa qərarını ləyaqətlə qəbul etdiyini bildirdi.
"Partiyam indi sual verir: bizi növbəti ümumi seçkilərə aparacaq ən yaxşı namizəd mənəmmi? Parlament qrupumuzun bu suala cavabını eşitdim və bunu ləyaqətlə qəbul edirəm", - deyə o, açıqlamasında bildirib.
Böyük Britaniya Baş naziri qeyd etdi ki, verdiyi hər bir qərar "sevdiyim ölkəni birinci yerə qoymaq" məqsədi daşıyır.
"Buna görə də Leyborist Partiyasının lideri vəzifəsindən istefa verirəm. Bu səhər qərarım barədə məlumat vermək üçün Əlahəzrət Kralla danışdım", - deyə Starmer bildirib.
Xatırladaq ki, Böyük Britaniyada siyasi vəziyyət yerli seçkilərdə Leyborist Partiyasının sarsıdıcı məğlubiyyətindən sonra kəskin şəkildə pisləşib.
May ayında xarici işlər naziri İvet Kuper də daxil olmaqla, hökumətin altı nüfuzlu üzvü ortaq mövqedə razılığa gəlmiş və Kir Starmerin istefasını tələb etmək niyyətində idi. O zaman o, bu cür çağırışları rədd etmiş və vəzifəsində xidmət etməyə davam edəcəyini vurğulamışdı.
Daha sonra partiya daxilində narazılıq açıq böhrana çevrildi. Hökuməti ilk tərk edən səhiyyə naziri Ues Stritinq oldu və o, Starmerə inamını itirdiyinə görə istefa verdiyini açıqladı. O, hökumətdə qalmasını prinsipsiz hesab etdiyini bildirdi.
Əziz MUSTAFA
