Beynəlxalq Cinayət Məhkəməsinin prokuroru Kərim Xan vəzifəsindən kənarlaşdırılıb
Beynəlxalq Cinayət Məhkəməsinin (BCM) Roma Statutuna Tərəf Dövlətlər Assambleyasının Bürosu prokuror Kərim Xanın ona qarşı cinsi təcavüz iddiaları ilə bağlı intizam icraatı barədə qərar çıxarılana qədər vəzifəsindən kənarlaşdırılması barədə qərar qəbul edib. Məhkəmə bu barədə açıqlama verib.
Qərar dərhal qüvvəyə minib. Büro həmçinin intizam icraatını BCM-in iştirakçı dövlətlər Assambleyasına göndərib və məsələni nəzərdən keçirmək üçün "mümkün qədər tez" xüsusi iclas çağırmaq qərarına gəlib. Prokurorun vəzifədən kənarlaşdırılmasının onun işi üzrə yekun qərarı əvvəlcədən müəyyən etmədiyi vurğulandı. Aydınlaşdırıldı ki, qərar BMT Daxili Nəzarət Xidmətləri Ofisi tərəfindən aparılan istintaq hesabatına, təqdim olunan sübutlara, məhkəmə ekspertiza qrupunun nəticələrinə və tərəflərin yazılı təqdimatlarına əsasən verilib. Qərarın məzmunu və ona əlavə edilmiş sənədlər açıqlanmayıb.
2025-ci ilin may ayında Xanın inzibati məzuniyyətə çıxacağı və 2024-cü ilin oktyabrında qaldırılan cinsi təcavüz iddiaları ilə bağlı istintaq zamanı xidmət etməyəcəyi açıqlandı. Avqust ayında The Guardian qəzeti başqa bir qadının 2009-cu ilə aid cinsi təcavüz iddiaları barədə Beynəlxalq Cinayət Məhkəməsinə məlumat verdiyini bildirdi. O vaxt o, 20 yaşlarının əvvəllərində idi və Beynəlxalq Cinayət Məhkəməsində və Haaqadakı digər tribunallarda baş müdafiə vəkili olan Xanın ofisində ödənişsiz təcrübəçi kimi çalışırdı.
Əziz Mustafa
