Ermənistanda parlament seçkiləri keçirilir: Seçicilər sülhə, yoxsa bölgədə yeni müharibəyə səs verəcəklər?
Bu gün Ermənistanda növbəti parlament seçkiləri keçirilır. Səsvermə Bakı vaxtı ilə səhər saat 8:00-də başlayıb və seçki məntəqələri saat 20:00-da bağlanacaq. Ermənistan Mərkəzi Seçki Komissiyası ilkin nəticələri ertəsi gün, yekun nəticələri isə yeddinci gündən gec olmayaraq açıqlayacaq.
Ermənistanda 2,5 milyon insan səs vermək hüququna malikdir. Onlar ölkə üzrə 2500 seçki məntəqəsində səs verə biləcəklər. Bunlardan təxminən 1700-ü videokameralarla təchiz olunub ki, bu da səsvermənin onlayn izlənməsinə imkan verir.
Seçki məntəqələri xaricdə açılmayacaq. Ermənistan vətəndaşları yalnız ölkə daxilində səs verə biləcəklər. Müxalifətin pozuculuq və təxribat fəaliyyətlərindən ehtiyat edən ölkəni hazırda idarə edənlər Rusiyadan gələn seçici axınını minimuma endirmək üçün hakimiyyət orqanları ölkəyə daxil olan hərbi xidmətə çağırılan əsgərlərə 25 günlük hərbi təlim üçün çağırış vərəqələri paylayır.
Ermənistanın hazırkı Baş naziri Nikol Paşinyan və onun "Vətəndaş Müqaviləsi" partiyası parlament seçkilərində ardıcıl üçüncü qələbəni təmin etməyə çalışacaqlar.
Paşinyanın bu seçkilərdə əsas rəqibi "Güclü Ermənistan" blokunun lideri, iş adamı Samvel Karapetyan olacaq. Onun blokuna "Güclü Ermənistan", "Yeni Dövr" və "Birləşmiş Ermənilər" partiyaları daxildir.
Karapetyanın partiyası iyunun 3-də Respublika Meydanında minlərlə insanın iştirak etdiyi mitinq keçirib. İki gün sonra, Paşinyanın birbaşa göstərişi ilə Aram Sarkisyanın Qərbyönümlü "Respublika" partiyası Mərkəzi Seçki Komissiyasına Karapetyanın blokunun qeydiyyatının etibarsız sayılması tələbi ilə ərizə təqdim edib. Ərizə 6 iyun gecəsi rədd edilib.
İyunun 5-də Paşinyanın tərəfdarları Respublika Meydanında minlərlə insanı cəlb edən mitinq keçiriblər.
Parlamentə düşmək şansı olanlar arasında Ermənistan İnqilab Federasiyası (Daşnaksutyun) ilə birlikdə "Ermənistan" blokunu yaradan keçmiş prezident Robert Köçəryan, "İrəli" partiyası, iş adamı Qagik Tsarukyanın "Çiçəklənən Ermənistan" və keçmiş ombudsman Arman Tatoyanın "Birlik Qanadları" da var.
Gallup tərəfdaşı olan MPG tərəfindən dərc edilən sorğulara görə, Paşinyanın Vətəndaş Müqaviləsi partiyası səslərin açıq əksəriyyətini qazanmayacaq. Respondentlərin yalnız 32,4%-i ona səs verməyə hazırdır.
Güclü Ermənistan blokunun səslərin 16,4%-ni alacağı gözlənilir. Keçmiş prezident Robert Köçəryanın Ermənistan (Hayastan) blokunun 15,2%, Qagik Tsarukyanın Çiçəklənən Ermənistan partiyasının isə 8,8% səs alacağı gözlənilir. Keçmiş ombudsman Arman Tatoyanın Birlik Qanadları partiyası (6,2%) da bu həddi keçə bilər.
İlk prezident Levon Ter-Petrosyanın Erməni Milli Konqresi də daxil olmaqla, qalan partiya və blokların partiyalar üçün 4%, bloklar üçün isə 8-10% parlament həddini keçmək şansı azdır.
Parlament yerləri bölüşdürüldükdən sonra heç bir siyasi qüvvə səslərin 54%-ni toplaya bilməsə, Seçki Məcəlləsinə görə, bütün partiyaların koalisiya hökuməti qurmaq üçün altı günü olacaq. Əgər parlamentdə səslərin 54%-ni təşkil edən koalisiya hələ də formalaşmasa, seçki günündən 28 gün sonra, birinci turda ən çox səs toplayan iki siyasi qüvvə arasında təkrar səsvermə keçiriləcək.
Ekspertlər bunu ehtimal olunmayan hesab etsələr də, təkrar səsvermənin mümkünlüyünü istisna etmirlər. Bundan əlavə, seçkilərdən sonra ölkədə mitinq və nümayişlərin baş verə biləcəyi ilə bağlı narahatlıqlar bildirilib.Vəziyyəti izləmək üçün polis əməliyyat qərargahı və işçi alt qruplar yaradıb və seçki günü əsas tədbirlər üçün plan hazırlanıb. Əməliyyat qərargahında həmçinin vətəndaşların qanun pozuntuları barədə məlumat verməsi üçün qaynar xətt fəaliyyət göstərir.
Beləliklə, Ermənistanda keçirilən seçkilərdə seçicilərin sülhə ya bölgədə yeni müharibəyə səs verəcəyi maraqla gözlənilir. Belə ki, Paşinyanın komandası seçkilərdə məğub olacağı təqdirdə böıgədə müharibə təhlükəsi artacaq. Bu isə Azərbaycan- Ermənistan müharibəsinin yenidən alovlanmasına gətirib çıxara bilər.
Əziz MUSTAFA
