Almaniyada XDS/XSS rəhbərliyi Mertsin istefasını müzakirə edir

Hakim Xristian-demokratlar (XDS/XSS) blokunun rəhbərliyi, islahatlarla bağlı problemlər və tarixi dərəcədə aşağı reytinqlər səbəbindən kansler Fridrix Mertsin istefası ehtimalını müzakirə edib. Oxuməni.az xəbər verir ki, bu barədə "Bild" qəzeti mənbələrə istinadən məlumat yayıb.

Nəşrin məlumatına görə, hələlik heç kim konkret istefa planları qurmur, söhbət dar dairələrdə belə bir imkanın öyrənilməsindən gedir. Mənbələr bildirib ki, müzakirələrdə iştirak edənlərin hamısı kanslerin dəyişdirilməsi halında partiya üçün yüksək siyasi riskləri dərk edir. "Bild"in məlumatına görə, partiya rəhbərliyi mətbuatda reaksiyadan qorxaraq cənab Mertsi açıq tənqid etməkdən çəkinir. Əvəzində fikir mübadiləsi əsasən onlayn çatlarda baş tutur.

Nəşr qeyd edir ki, kanslerin əvəz edilməsi üçün XDS/XSS-in hakim koalisiyadakı tərəfdaşlarının – sosial-demokratların dəstəyi lazımdır. Lakin "Bild"in məlumatına görə, Sosial-demokratların (SDPG) cənab Mertsdən narazılığı o qədər böyükdür ki, parlament fraksiyasının yüksək vəzifəli üzvləri də kanslerin əvəz edilməsi ssenarisini nəzərdən keçirirlər.

"Bild"in həmsöhbətlərinin fikirləri Fridrix Mertsin istefaya nə qədər asan razı olacağı barədə fərqlənir. Bir mənbə bildirib ki, kansler ictimai rəyi diqqətlə izləyir və əsas islahatlar uğursuz olarsa, təslim ola bilər. Başqa bir həmsöhbətin sözlərinə görə, cənab Merts o qədər də çətinliklə nail olduğu vəzifəsini könüllü tərk etməyəcək.

Aprel ayının sonlarında keçirilən ARD DeutschlandTrend sorğusuna görə, almanların 84%-i hakim koalisiyanın fəaliyyətindən narazıdır. Almanların yalnız 20%-i XDS/XSS və SDPG blokunun sosial təminat sisteminin dayanıqlılığını təmin edə biləcəyinə, 26%-i isə hökumətin iqtisadiyyatı sabitləşdirə biləcəyinə inanır.

Almaz Həsənli