Moskva Ermənistana qaz, yanacaq və almaz tədarükü sazişinin pozulması ilə hədələyir

Rusiya, İrəvan Avropa İttifaqı ilə yaxınlaşma kursuna sadiq qalarsa, Ermənistanla qaz, neft məhsulları və xam almazların gömrüksüz tədarükü haqqında sazişi dayandıra və ya ləğv edə bilər.

Oxuməni.az xəbər verir ki, bu barədə Rusiya Federasiyasının Energetika Naziri Sergey Tsivilevin Ermənistanın Ərazi İdarəetmə və İnfrastruktur Nazirliyinə ünvanladığı məktubda bildirilir. Bu barədə çərşənbə axşamı, mayın 26-da "Kommersant" qəzeti öz saytında yazıb.

Yuxarıda adı çəkilən malların Rusiya Federasiyasından Ermənistana gömrüksüz tədarük rejimi 2013-cü ilin dekabrından qüvvədədir. Lakin bu gün Moskva onun saxlanılmasını "mümkünsüz" hesab edir, nəşrdə deyilir. "Ermənistanın Avropa İttifaqı ilə qarşılıqlı əlaqələrinin dərinləşdirilməsi istiqamətində davam edən praktiki addımlar və Ermənistan hökumətinin Aİ-yə daxil olmaq istəyi, Rusiya-Ermənistan ticarət-iqtisadi və investisiya əməkdaşlığının fundamental yüksək səviyyəsinin saxlanılmasına və inkişafına təhdid yaradır, bunun əsaslarından biri ikitərəfli beynəlxalq müqavilələrdir", - deyə "Kommersant" Tsivilevin məktubundan sitat gətirir. İddia olunur ki, mayın 25-də İrəvana göndərilən bu sənədin bir nüsxəsi redaksiyanın sərəncamına daxil olub.

Ermənistanın müvafiq qurumu hələlik rəsmi cavab verməyib. Ermənistan və Rusiya 2013-cü ildə gömrüksüz tədarük haqqında saziş bağlayıblar. Bu saziş Ermənistana neft məhsulları, qaz və almaz idxalı üçün ixrac rüsumlarını müddətsiz ləğv edib.

Almaz Həsənli