Ermənistan və ABŞ mühüm mineralların tədarükünü sürətləndirmək niyyətindədirlər

Ermənistan və ABŞ mühüm mineralların tədarükünü sürətləndirmək imkanlarını araşdıracaq və bu prosesdə Trampın Beynəlxalq Sülh və Rifah Marşrutunun (TRIPP) rolunu qəbul edəcəklər. Bu, Ermənistan və ABŞ arasında mühüm mineralların və nadir torpaq elementlərinin tədarükünün təmin edilməsi haqqında çərçivə sazişində qeyd olunur. Sənəd 26 may tarixində Yerevanda Ermənistanın xarici işlər naziri Ararat Mirzoyan və ABŞ dövlət katibi Marko Rubio tərəfindən imzalanıb.

Sənəddə deyilir: "İştirakçılar qabaqcıl istehsal və əlaqəli sənaye bazalarını dəstəkləmək üçün lazım olan vacib mineralların təhlükəsiz tədarükünü sürətləndirmək üçün əməkdaşlığı genişləndirmək yollarını araşdırmaq niyyətindədirlər. Buraya sənaye tələbi və ehtiyat yığımı üçün infrastruktur kimi mövcud siyasət alətlərindən istifadə daxildir. İştirakçılar həmçinin Cənubi Qafqaz və Orta Asiyadan vacib mineralların tranzitini dəstəkləməkdə Beynəlxalq Sülh və Rifah üçün Tramp Marşrutunun (TRIPP) əhəmiyyətini qəbul edirlər".

Həmçinin qeyd olunur ki, sazişin imzalanmasından sonrakı altı ay ərzində "iştirakçılar" hər bir ölkədə "ABŞ və Ermənistan Respublikasındakı müştərilərə satış üçün son məhsullar istehsal etməsi gözlənilən" layihələrin maliyyələşdirilməsi də daxil olmaqla, asanlaşdırma tədbirlərini araşdırmaq niyyətindədirlər. Sənəddə ABŞ-ın təchizat zəncirlərini gücləndirmək üçün mədən və emal səmərəliliyini modernləşdirmək məqsədilə texnologiyanı Ermənistan müəssisələrinə ötürmək niyyəti bildirilir. Sənədə əsasən, iştirakçılar həmçinin təchizat zəncirinin təhlükəsizliyini təmin etmək və mövcud əməkdaşlıq mexanizmlərindən istifadə etmək üçün üçüncü tərəflərlə əməkdaşlıq etmək niyyətindədirlər.

Sənəddə həmçinin bildirilir ki, hər iki tərəf 30 gün əvvəldən yazılı bildirişlə çərçivə proqramında iştirakını dayandıra bilər.

Qeyd olunur ki, çərçivə proqramı heç bir hüquq və ya öhdəlik müəyyən etməyən və ya yaratmayan bir siyasət və fəaliyyət planıdır.

Əziz Mustafa