ABŞ Senatı ilk dəfə İranla müharibənin dayandırılması barədə qətnaməni dəstəklədi

ABŞ Konqresinin Senatı prosedura səsverməsi zamanı Vaşinqton administrasiyasına İrana qarşı hərbi əməliyyatları dayandırmağı faktiki olaraq əmr edən qətnaməni ilk dəfə dəstəklədi. Oxuməni.az “TASS”a istinadla xəbər verir ki, bu barədə çərşənbə axşamı C-SPAN telekanalı məlumat yayıb.
Bu sənədin lehinə 50, əleyhinə isə 47 qanunverici səs verib. Demokrat Partiyasının əksər nümayəndələri ilə yanaşı, qətnamənin lehinə respublikaçılar Rend Pol (Kentukki ştatından), Liza Murkovski (Alyaskadan), Syuzan Kollinz (Men ştatından) və Bill Kassidi ( Luizianadan) səs veriblər. Onu dəstəkləməyən yeganə demokrat Con Fetterman (Pensilvaniya ştatından) olub.
Daha əvvəl Konqresin yuxarı palatası oxşar səsvermələr zamanı bu sənədi yeddi dəfə rədd etmişdi. "The Hill" qəzeti vurğulayır ki, qətnamənin yekun səsvermə nəticəsində Senat, sonra isə Konqresin Nümayəndələr Palatası tərəfindən təsdiqlənməsi halında belə, ölkə prezidenti Donald Tramp ona veto qoyacaq.
ABŞ və İsrail fevralın 28-də İrana qarşı müharibəyə başlayıblar. Aprelin 7-də ABŞ lideri İslam Respublikası ilə iki həftəlik qarşılıqlı atəşkəs elan edib. Aprelin 11-də Tehran və Vaşinqton nümayəndə heyətləri İslamabadda danışıqlar aparıblar, lakin bir sıra ziddiyyətlər səbəbindən münaqişənin uzunmüddətli həlli məsələsində razılığa gələ bilməyiblər. Aprelin 21-də ABŞ prezidenti İranla atəşkəs rejimini uzatmaq niyyətində olduğunu bildirib.
Mayın 1-də ABŞ administrasiyasının rəhbəri rəsmən ABŞ Konqresinin rəhbərliyinə Ağ Evin İranla müharibəni başa çatmış hesab etdiyini bildirib. Lakin bu addım, görünür, əsasən ABŞ Silahlı Qüvvələrinin xaricdəki münaqişələrdə tətbiqini tənzimləyən milli qanunvericiliyin müddəalarına riayət etmək zərurətindən irəli gəlirdi.
Almaz Həsənli