Səudiyyə Ərəbistanı İranla təcavüz etməmək haqqında pakt bağlamağı təklif edib
Səudiyyə Ərəbistanı rəsmiləri müharibədən sonra regional təhlükəsizlik məsələləri üzrə məsləhətləşmələr çərçivəsində Yaxın Şərq ölkələri və İran arasında təcavüz etməmək haqqında pakt ideyasını müttəfiqlərinə təklif ediblər.
Oxuməni.az xəbər verir ki, "Financial Times" nəşri mənbələrə istinadən məlumat verib ki, soyuq müharibə dövründə Avropada gərginliyi azaltmağa nail olmuş Helsinki sazişləri uyğun model kimi nəzərdən keçirilir.
Bir ərəb diplomatının fikrincə, belə bir pakt əksər ərəb ölkələri, eləcə də İran tərəfindən qəbul ediləcək. Onun sözlərinə görə, İran uzun müddətdir ki, ABŞ və Qərbə regionun öz işlərini özünün idarə etməsi ideyasını çatdırmağa çalışır.
FT mənbələri Səudiyyə Ərəbistanının ideyasını bir çox Avropa rəsmilərinin artıq dəstəklədiyini və digər Fars körfəzi ölkələrini də bunu təsdiqləməyə çağırdıqlarını bildiriblər.
FT qeyd edir ki, müharibədən sonra İran zəifləsə də, Fars körfəzi ölkələri onun yenə də onlara təhlükə yaratacağından qorxur - xüsusən də Amerika mövcudluğunun azalması fonunda.
ABŞ və İsrailin İranla müharibəsinin əvvəlində Fars körfəzi ölkələri İran dronlarının hücumlarından əziyyət çəkiblər. Döyüş əməliyyatları səbəbindən bu ölkələrin səması qısa müddətə bağlanıb ki, bu da aviasiya sənayesində böhrana səbəb olub.
Bununla yanaşı, Türkiyə Fars körfəzi ölkələrinin İran əleyhinə Amerika-İsrail müharibəsinə qoşulmasının qarşısını almaq üçün intensiv diplomatik səylər göstərir. “Bloomberg”-in məlumatına görə, Ankara Fars körfəzi ölkələrini təmkinli davranmağa çağırıb.
Almaz Həsənli
