Rusiyada pravoslav xristianların sayı nəzərəçarpacaq dərəcədə azalıb
Ukraynaya qarşı müharibə fonunda Rus Pravoslav Kilsəsi müntəzəm olaraq Rusiya hökumətinin hərəkətlərini dəstəkləyən bəyanatlar verir.
Özünü pravoslav xristian hesab edən rusların payı son 15 ildə 78%-dən 65%-ə düşüb. Rusiya mediasının məlumatına görə, bunu Pravoslav Müqəddəs Tixon Humanitar Elmlər Universiteti tərəfindən aparılan sorğunun nəticələri sübut edir.
Tədqiqata görə, respondentlərin 9%-i özlərini müsəlman, 3%-i digər dinlərin üzvləri kimi təqdim edib. Digər 16%-i heç bir dinə mənsub olmadığını, 6%-i isə özlərini ateist kimi təqdim edib.
Müqayisə üçün, 2011-ci ildə respondentlərin 78%-i özlərini pravoslav xristian, 2%-i ateist və 11%-i isə dini mənsubiyyətsiz kimi təqdim edib.
Tədqiqat həmçinin özünü pravoslav hesab edənlər arasında kilsə həyatında iştirakın aşağı səviyyədə olduğunu aşkar etdi. Rusların təxminən üçdə biri (32%) heç vaxt kilsə ibadətlərinə qatılmadığını bildirib. Yalnız 17%-i ildə bir neçə dəfə ibadətlərə qatıldığını bildirib.
Ukraynadakı müharibə fonunda Rus Pravoslav Kilsəsi müntəzəm olaraq Rusiya hökumətinin hərəkətlərini dəstəkləyən bəyanatlar verir. 2024-cü ilin mart ayında Patriarx Kirillin sədrliyi ilə keçirilən Ümumdünya Rus Xalq Şurasında tammiqyaslı müharibə "müqəddəs" adlandırılıb.
Kiril həmçinin Putin, Rusiya hökuməti və Rusiya ordusu üçün dua etməyə çağırıb və 2026-cı ilin yanvar ayında Kremlin siyasəti ilə razılaşmayanların "vətənə xain" hesab edilməli olduğunu bəyan edib.
Bu fonda Rusiyada kilsələrin militarizasiyası güclənib. Kilsələr hərbi təlimatçıların iştirakı ilə atıcılıq kursları təklif etməyə başlayıblar. Bəzi keşişlər müharibəni dəstəkləmək və Rusiya Müdafiə Nazirliyi ilə müqavilələrin imzalanması üçün kampaniya aparmaq üçün moizələrdən istifadə edirlər.
Əziz Mustafa
