Fərqanə sakini Rusiya tərəfində Ukraynaya qarşı döyüşdüyünə görə iki il həbs cəzasına məhkum edilib

.Fərqanə vilayətinin Özbəkistan Rayon Cinayət Məhkəməsi Rusiyanın Ukraynaya qarşı müharibəsində iştirak edən bir vətəndaşa hökm oxuyub.

Təfərrüatlara görə, 53 yaşlı N.İ. 2023-cü ildə pul qazanmaq üçün Rusiyaya gedib.

"10 sentyabr 2023-cü ildə Soçiyə işləməyə getdim. İkinci gün Rusiya polisi işə başlamazdan əvvəl yaşadığım mənzilə gəlib axtarış apardı. Mətbəxdə az miqdarda narkotik tapdılar. Daha sonra narkotik qaçaqmalçılığında ittiham olundum və məhkəmə məni səkkiz il həbs cəzasına məhkum etdi", - deyə o, məhkəmədə bildirib.

Saratov vilayətində cəzasını çəkərkən ona Rusiya ordusuna qoşulmaq imkanı təklif edilib. 2025-ci ilin avqust ayında o, Rusiya Silahlı Qüvvələri ilə 2,4 milyon rubl maaşla müqavilə imzalayıb.

"Əvvəlcə imtina etdim, amma işgəncə və təzyiqdən sonra razılaşmağa məcbur oldum və hərbi müqavilə imzaladım. 2025-ci ilin sentyabr ayında Donetsk vilayətindəki hərbi hissədə hərbi təlim keçdikdən sonra Rusiya Silahlı Qüvvələrində sıravi əsgər kimi Ukraynaya qarşı döyüş əməliyyatlarında iştirak etdim", - deyə o, məhkəmədə ifadə verib.

Təqsirləndirilən şəxs bildirib ki, pilotsuz təyyarənin hücumu zamanı sol kürək sümüyünün sınığı və sol yanağında və sol gözündən qəlpə yaraları alıb, bundan sonra xəstəxanaya yerləşdirilib.

Ötən ilin noyabr ayında o, xəstəxanadan çıxıb, daha sonra Moskvadakı Özbəkistan səfirliyi ilə əlaqə saxlayıb və evə qayıdıb.

Məhkəmədə təqsirləndirilən şəxs günahını tam etiraf edib, peşman olduğunu bildirib və təzyiq altında döyüş əməliyyatlarında iştirak etməyə razı olduğunu bildirib.

Məhkəmə N.İ.-ni Cinayət Məcəlləsinin 154-cü maddəsinin 1-ci hissəsi (Muzdlu fəaliyyət) ilə iki il müddətinə azadlıqdan məhrum edib. O, cəzasını ümumi rejimli cəza koloniyasında çəkəcək

Əziz MUSTAFA