Zelenski Lukaşenkonun oğulları və Rusiya ordusuna xidmət edən Belarus şirkətlərinə qarşı sanksiyalar tətbiq etdi
Prezident Volodimir Zelenski, Ukraynaya qarşı silahlı təcavüzdə kömək etdiyinə görə Belarus müəssisələrinə, həmçinin Aleksandr Lukaşenkoya yaxın şəxslərə qarşı sanksiyalar tətbiq etmək barədə Milli Təhlükəsizlik və Müdafiə Şurasının qərarını qüvvəyə mindirən fərman imzalayıb.
Oxuməni.az xəbər verir ki, bu barədə aprelin 29-da Ukrayna Prezident Aparatının saytında məlumat verilib.
"Mən artıq Ukraynanın yeni sanksiyalar paketini imzaladım – əhəmiyyətli bir paket, o cümlədən Belarusdan olan subyektlərə qarşı. Bu, bir çox tərəfdaşlarımıza bu müharibənin səviyyəsini, intensivliyini azaltmaq üçün nəyə təzyiq göstərməyin lazım olduğuna dair bir siqnaldır. Rusiyanın yaxşı niyyəti yoxdur, onu təcavüzü azaltmaq üçün lazım olan addımlara məcbur etmək lazımdır, sonra isə öz "yaxşı niyyət jestləri" adlandırsınlar. Belarusun müharibəyə cəlb olunmaması lazımdır. Digər Avropa ölkələrinə qarşı əməliyyatların olmaması lazımdır. Rusiyanın Ukraynaya qarşı bu müharibəsində layiqli sülh olmalıdır. Ukraynanın belə bir gələcəyi olması üçün döyüşən və çalışan hər kəsə təşəkkür edirəm", - deyə Ukrayna dövlət başçısı bildirib.
PA-nın məlumatına görə, sanksiya paketinə 16 Belarus vətəndaşı və 11 hüquqi şəxs daxildir.
Sanksiya siyahısına Belarus Silahlı Qüvvələrinin Baş Qərargah rəisi Pavel Muraveyko da daxil edilib.
Sanksiyalar tətbiq edilən fiziki şəxslər arasında Lukaşenkonun yaxın silahdaşı, uzun illər Belarusda yüksək dövlət vəzifələrində çalışmış Viktor Şeyman da var.
Həmçinin, Belarus prezidentinin oğulları Viktor və Dmitri Lukaşenko da Milli Təhlükəsizlik və Müdafiə Şurasının sanksiyalarına məruz qalıblar. Ukrayna rəsmiləri qeyd ediblər ki, onlar beynəlxalq sanksiyalardan yayınaraq məhsul ixracı, ikili təyinatlı malların tədarükü və Belarus ərazisi vasitəsilə yenidən ixracla məşğuldurlar.
Bundan əlavə, 11 hüquqi şəxsə qarşı sanksiyalar tətbiq edilib. Onların arasında "Termoplast" Minsk zavodu, №407 Minsk Mülki Aviasiya Zavodu, Vitebsk Elektrik Ölçü Cihazları Zavodu və Borisov Plastik Məmulatlar Zavodu var. Şirkətlərə qarşı məhdudiyyətlər də 10 il müddətinə nəzərdə tutulub və analoji tədbirlər siyahısını əhatə edir.
Almaz Həsənli
