ABŞ Meksika rəsmilərini narkotik qaçaqmalçılığında ittiham edib
ABŞ Ədliyyə Nazirliyi Meksikanın Sinaloa ştatının qubernatorunu və digər doqquz hazırkı və keçmiş rəsmini Sinaloa narkotik karteli ilə əlaqədə olmaqda və ABŞ-a narkotik qaçaqmalçılığını asanlaşdırmaqda ittiham edib. Associated Press-in məlumatına görə, təqsirləndirilən şəxslərdən heç biri həbsdə deyil. Lakin Meksika hökuməti ekstradisiya üçün "bir neçə sorğu" alıb.
76 yaşlı Sinaloa qubernatoru Ruben Roça Moyaya qarşı ittihamlar arasında narkotik idxalı üçün sui-qəsd, odlu silah və partlayıcı qurğuların saxlanması və başqa bir sui-qəsd maddəsi var. Onu ömürlük həbs cəzası və ya məcburi minimum 40 il həbs cəzası gözləyir. Cənab Moya ittihamları "qətiyyən və tamamilə rədd etdiyini" bildirib. O, ABŞ Ədliyyə Nazirliyinin hərəkətlərini Meksikanın hakim partiyasına və onun liderlərinə qarşı "hücum" adlandırıb.
İttihamnaməyə görə, bəzi Meksika rəsmiləri Sinaloa narkotik kartelində şəxsən iştirak ediblər və qaçaqmalçılığın asanlaşdırılmasında "həlledici rol oynayıblar". ABŞ prokuroru Cey Kleyton mətbuat açıqlamasında bildirib ki, "Sinaloa Karteli və digər oxşar narkotik ticarəti təşkilatları, maaşlarında olan korrupsioner siyasətçilər və hüquq-mühafizə orqanlarının əməkdaşları olmadan bu qədər sərbəst və uğurla fəaliyyət göstərə bilməzdilər".
Açıq ittiham ABŞ-ın Meksikadakı səfiri Ron Consonun ABŞ administrasiyasının mütəşəkkil cinayətkarlıqla əlaqəli olduğunu iddia etdiyi Meksika rəsmilərinə qarşı antikorrupsiya kampaniyasına başlayacağı barədə verdiyi açıqlamadan sonra irəli sürülüb. Meksika prezidenti Klaudiya Şeynbaum hökumətinin korrupsiya iddiaları ilə bağlı heç bir dəlil görmədiyini bildirib.
Əziz MUSTAFA
