Pentaqon Ukraynaya 400 milyon dollarlıq dondurulmuş vəsaitin ayrılmasını təsdiqlədi

07:48

Bəyəndim (1) Bəyənmədim (0)

ABŞ Müdafiə Naziri Pit Heqset Pentaqonun Ukrayna üçün nəzərdə tutulmuş 400 milyon dollarlıq dondurulmuş vəsaiti açdığını açıqladı. Bloomberg bu barədə cümə axşamı, 30 apreldə məlumat verib.
"Vəsaitlər Avropa imkanlarını yaratmaq üçün ayrılıb və dünəndən etibarən onlar buraxılıb", Heqset Nümayəndələr Palatasının Silahlı Qüvvələr Komitəsinin dinləməsi zamanı bildirib.

Pentaqon nəzarətçisi vəzifəsini icra edən Jules Hurst ayrılan vəsaitlərin istifadəsinin Ukraynanın almaq qərarına gəldiyi konkret silahlardan asılı olacağını bildirib.

Daha əvvəl Respublikaçı senator Mitch McConnell Pentaqonu Konqresin bir neçə ay əvvəl təsdiqlədiyi Ukrayna üçün maliyyələşdirməni gecikdirdiyinə görə sərt tənqid etmişdi. Senator The Washington Post qəzetindəki köşəsində sözügedən vəsaitlərin "Pentaqonda toz yığan" vacib 400 milyon dollar olduğunu vurğuladı.

Xatırladaq ki, ötən ilin 17 dekabrında ABŞ Senatı, digər məsələlərlə yanaşı, Ukraynaya 400 milyon dollar yardım göstərilməsini nəzərdə tutan 901 milyard dollarlıq 2026-cı il Müdafiə Siyasəti Qanununu təsdiqləmişdi.

Əziz MUSTAFA