Reydlərdən sonra Rusiya təxminən 6000 əcnəbinin deportasiyasına qərar verib
Bu ilin mart ayında qanunsuz miqrasiya ilə mübarizə məqsədilə keçirilən reydlərdən sonra Rusiya təxminən 6000 əcnəbinin deportasiyasına qərar verib. Bu məlumatı Rusiya Daxili İşlər Nazirliyinin rəsmi sözçüsü İrina Volk Telegram kanalında dərc edib.
Bundan əlavə, yoxlamalar nəticəsində Rusiya müstəntiqləri təxminən 1000 cinayət işi açıblar. Reydlər zamanı 138 nəfərin axtarışda olduğu müəyyən edilib. Daha 7700 əcnəbi vətəndaşın Rusiyaya girişinə icazə verilməməsi barədə qərar qəbul edilib.
Ümumilikdə 48000 inzibati xəta da aşkar edilib. 26000-dən çox miqrant məsuliyyətə cəlb edilib, onlardan 24000-i məcburi barmaq izi və fotoşəkil çəkdirib.
Volk əlavə edib ki, mart ayında Rusiya Milli Qvardiyasının dəstəyi ilə Daxili İşlər Nazirliyinin və Federal Təhlükəsizlik Xidmətinin nümayəndələrinin iştirakı ilə ölkə daxilində qanunsuz miqrasiyaya qarşı mübarizə reydləri keçirilib.
Bu dəfə nəqliyyat infrastrukturu obyektlərinin yoxlanılmasına xüsusi diqqət yetirilib. Reydlərə bazarlar, anbarlar, sənaye zonaları və əcnəbilərin yaşayış yerləri də daxil olub. Ümumilikdə, yuxarıda adı çəkilən qurumların əməkdaşları 130.000-dən çox obyekti yoxlayıblar.
Reyddə təxminən 60.000 polis əməkdaşı iştirak edib. Səmərəliliyi artırmaq üçün dronlar və digər müasir texnologiyalardan istifadə edilib.
Daxili İşlər Nazirliyinin məlumatına görə, 2025-ci ildə Rusiyadan 72.000 xarici vətəndaş deportasiya edilib.
Bundan əlavə, bu rəqəm arta bilər, çünki Dövlət Dumasının deputatları miqrantların ölkədən deportasiyası üçün əsasların siyahısını 22-dən 43-ə qədər ikiqat artırmaq niyyətindədirlər.
Xüsusilə, deportasiya üçün əsaslara ictimai asayişi pozmaq, polis və ya Milli Qvardiyanın əmrlərinə tabe olmamaq və infrastruktur və nəqliyyata mane olmaq daxildir.
Siyahıya həmçinin "ictimai əxlaqı təhqir edən" materialların onlayn yayımı, eləcə də Rusiya ordusunu nüfuzdan salan hesab edilən hər hansı ictimai hərəkətlər və ya Rusiya Federasiyasına qarşı sanksiya çağırışları daxil ediləcək.
Əziz MUSTAFA
