Hərbi münaqişə 162 ölkədə on milyonlarla insanı risk altına qoyur
BMT İnkişaf Proqramı tərəfindən dərc edilən hesabata görə, Yaxın Şərqdə iqtisadi böhran və hərbi münaqişənin şiddətlənməsi səbəbindən dünyada təxminən 32 milyon insan yoxsulluq həddinə düşə bilər.
Yaxın Şərqdə davam edən hərbi münaqişə 162 ölkədə on milyonlarla insanı risk altına qoyur. Fars körfəzi, Asiya, Afrika və kiçik ada dövlətləri xüsusilə risk altındadır. BMT İnkişaf Proqramının məlumatına görə, müvəqqəti atəşkəsə baxmayaraq, hərbi münaqişənin nəticələri "kəskin" mərhələdən "uzunmüddətli" mərhələyə keçir. Bu mərhələ nə qədər uzun davam edərsə, həssas ölkələrdə yoxsulluğun artmasının sürətlənməsi riski bir o qədər yüksəkdir - ən pis ssenaridə əlavə 32 milyon insan yoxsulluq həddinin altına düşə bilər.
Təsirin əsas hissəsi münaqişədə birbaşa iştirak edən və enerji idxalından asılı olan ölkələrə dəysə də, BMTİP daha kasıb ölkələrə, hətta müharibə zonasından uzaqda olan ölkələrə də uzunmüddətli əhəmiyyətli ziyan vurduğunu qeyd edir.
"Müharibə tərs inkişafdır. Münaqişə ölkələrin illər ərzində qurduqlarını həftələrlə məhv edə bilər. Təhlillərimiz göstərir ki, Yaxın Şərqdəki eskalasiyanın nəticələri birbaşa təsirlənən ölkələrlə məhdudlaşmır - onlar artan enerji və ərzaq qiymətlərinin öhdəsindən gəlmək üçün ən az gücü olanlara qeyri-mütənasib şəkildə zərbə vururlar. Onlar bu gün qiymətləri sabitləşdirməklə sabah səhiyyə, təhsil və iş yerlərini maliyyələşdirmək arasında seçim etmək məcburiyyətində qalırlar. Bu, qəbuledilməzdir və qarşısı alına bilər. Erkən tədbirlər çox vacibdir", - BMTİP-in administratoru və BMT-nin baş katibinin müavini Aleksandr De Kru bildirib.
Əziz MUSTAFA
