Dubayda minlərlə heyvan, ekspatların kütləvi gedişi səbəbindən küçələrə atılıb

Dubayda sahibsiz ev heyvanlarının sayında kəskin artım müşahidə olunur. Xeyriyyə təşkilatlarının məlumatına görə, İranla müharibə fonunda sahibləri olan ekspatlar bölgəni təcili tərk etməyə başladıqdan sonra minlərlə pişik və it küçələrdə qalıb. Oxuməni.az xəbər verir ki, bu barədə “The Guardian” yazır.
Sığınacaqlar və könüllü təşkilatlar həddindən artıq yüklənmə barədə məlumat verirlər. Xilasedicilər mikroçipli heyvanlar tapırlar. Bu, onların əvvəllər sahiblərinin olduğunu göstərir.
Yerli xeyriyyə təşkilatının rəhbəri Hanna Meynds deyib: "Bəziləri çiplənmişdi və açıq-aydın sevilirdilər, lakin ailələri sadəcə getdi. Bu, xilasedicilər üçün ürəkparçalayıcı, heyvanlar üçün isə qorxuludur."
“Dubai Street Kitties” könüllü təşkilatı da sığınacaqlarda kritik vəziyyət barədə məlumat verib: "Biz həddə çatmışıq. Hər otaq doludur, hər yer tutulub, zənglər isə gəlməyə davam edir – yaralı pişiklər, atılmış pişiklər, təkbaşına sağ qalmağa çalışan balalar."
Dubay Bələdiyyəsi, küçə heyvanlarına kömək etmək üçün süni intellekt texnologiyalarından istifadə edərək şəhər boyu 12 avtomatik yemləmə stansiyası quraşdırmağa başlayıb.
BƏƏ-də ev heyvanlarını atmaq qanunsuzdur. Bu cür pozuntuya görə böyük cərimələr nəzərdə tutulur.

Almaz Həsənli