ABŞ Ekvadorda narkotik ticarətinə qarşı əməliyyat keçirib

Amerika və Ekvador hərbi qüvvələri Ekvadorda narkotik ticarətinə qarşı birgə əməliyyatlara başlayıb. Oxuməni.az xəbər verir ki, bu barədə ABŞ Silahlı Qüvvələrinin Cənub Komandanlığı X sosial şəbəkəsindəki rəsmi səhifəsində məlumat yayıb.
Hərbçilərin bəyanatında deyilir: "Biz birlikdə yarımkürənin hər yerində vətəndaşlar arasında uzun müddət terror, zorakılıq və korrupsiya yayan narkoterrorçulara qarşı qətiyyətli addımlar atırıq".
Ekvador Müdafiə Nazirliyi "hücum" əməliyyatı çərçivəsində ABŞ ilə əməkdaşlıq etdiyini bildirib və əlavə edib ki, təfərrüatlar məxfidir.
ABC News qeyd edir ki, bu, Amerika hərbçilərinin Latın Amerikası narkokartellərinə qarşı mübarizə çərçivəsində quru əməliyyatında ilk dəfə iştirak etməsidir - bundan əvvəl ABŞ Silahlı Qüvvələri Sakit okean və Karib dənizində yalnız narkotik daşıyan gəmilərə hava zərbələri endirirdi.
ABC News-un mənbəsinin məlumatına görə, Amerika silahlı qüvvələrinin rolu Ekvadorda hərbi müşavirlərin olması idi. Onlar planlaşdırma, kəşfiyyat və əməliyyat dəstəyi təmin edirdilər, lakin əməliyyatın quru və hava-desant hissəsində birbaşa iştirak etmirdilər.
Almaz Həsənli