AB səfiri: Brüssel Türkmənistan prezidentinin səfərini gözləyir

Türkmənistan prezidenti Serdar Berdimuhamedov Brüsseldə xoş qarşılanan qonaqdır və tərəflər onun səfərinin tarixi ilə bağlı razılığa gəlməyi gözləyirlər. Bu barədə Türkmənistan Xarici İşlər Nazirliyində keçirilən brifinqdə Avropa İttifaqının Aşqabaddakı səfiri Beata Peksa bildirib.

Peksanın sözlərinə görə, AB artıq Avropa Komissiyası, Avropa Şurası, Avropa Parlamenti və Avropa Komissarları prezidentləri ilə danışıqlar da daxil olmaqla yüksək səviyyəli görüşlər keçirmək qərarına gəlib.

"Prezident Serdar Berdimuhamedov Brüsseldə Komissiya, Şura, Parlament prezidentləri və komissarlarla görüşlər üçün xoş qarşılanan qonaqdır. Qərar verilib; hamı sadəcə tarixin razılaşdırılmasını gözləyir", - deyə o bildirib.

Səfir qeyd edib ki, qarşıdan gələn səfərin gündəliyi geniş olacaq və siyasi məsləhətləşmələr, enerji təhlükəsizliyi, təhsil və gənclər əməkdaşlığını əhatə edəcək. Hazırda əsas məsələ Avropa rəhbərliyinin sıx qrafiki nəzərə alınmaqla uyğun tarixin seçilməsi olaraq qalır.

Türkmənistan xarici işlər nazirinin müavini Myahri Byaşimova səfərin tarixləri ilə bağlı danışıqların davam etdiyini təsdiqləyib. Onun sözlərinə görə, görüşdə imzalanmaq üçün sənədlər paketinin hazırlanması planlaşdırılır.

"Tarixlər və müddətlər dəqiqləşdirildikdə, əlbəttə ki, sizə əlavə məlumat verəcəyik", - deyə o əlavə edib.

Fevralın 17-də Türkmənistan Xarici İşlər Nazirliyində Türkmənistan və Avropa İttifaqı arasında əməkdaşlıq mövzusunda brifinq keçirilib. Tədbirdə 2025-ci il üçün əməkdaşlığın nəticələri ümumiləşdirilib və 2026-cı il üçün əsas tərəfdaşlıq prioritetləri müəyyən edilib. Türkmənistan Xarici İşlər Nazirliyinin, ölkədə akkreditə olunmuş diplomatik nümayəndəliklərin, Aİ qurumlarının və medianın nümayəndələri iştirak ediblər.

Əziz MUSTAFA