ABŞ bütün qoşunlarını iki ay ərzində Suriyadan çıxaracaq

ABŞ Suriyadan təxminən 1000 nəfərlik bütün Amerika hərbi qulluqçularını çıxarmağı planlaşdırır. Oxuməni.az-ın məlumatına görə, bu barədə “Wall Street Journal” mənbələrə istinadən xəbər verib.
Qəzetin həmsöhbətlərinin sözlərinə görə, Amerika hərbçiləri yaxın iki ay ərzində Suriyanı tərk edəcəklər.
Daha əvvəl bildirilmişdi ki, ABŞ hərbçiləri Suriyanın şimal-şərqindəki Əl-Həsəkə əyalətində yerləşən əsas bazaları olan Əş-Şəddadini tərk ediblər. Obyekti Suriya ordusu ələ keçirib, bazanın nəzarətinin ötürülməsi Amerika tərəfi ilə koordinasiyalı şəkildə həyata keçirilib.
Keçən həftə amerikalılar Suriyanın cənubundakı Ət-Tənf bazasından da çıxıblar.
2025-ci ilin aprelində “The New York Times” ABŞ-ın Suriyadakı hərbi kontingentinin sayını azaltmağa başladığını bildirdi. Hərbçilər ölkənin şimal-şərqindəki səkkiz bazadan üçünü bağlamağı, qoşunların sayını 2 mindən 1,4 minə endirməyi planlaşdırırdılar. Eyni zamanda, yerli Amerika qoşun komandanlığı "Suriyada ən azı 500 Amerika hərbçisi saxlamağı" tövsiyə etmişdi.
Almaz Həsənli