ABŞ-da vətəndaş hüquqları mübarizi və iki dəfə ABŞ prezidentliyinə namizəd olan Cessi Cekson vəfat edib

ABŞ-da vətəndaş hüquqları hərəkatının lideri, 1984 və 1988-ci illərdə prezidentliyə namizəd olan pastor Cessi Cekson 84 yaşında vəfat edib.
Oxuməni.az-ın “Euronews”a istinadən verdiyi məlumata görə, onun ölümü ilə bağlı ailəsi məlumat yayıb və Ceksonun yaxınlarının əhatəsində sakit şəkildə dünyasını dəyişdiyini bildirib.
Cekson ailəsinin bəyanatında deyilir: “Onun ədalətə, bərabərliyə və insan hüquqlarına sarsılmaz sədaqəti azadlıq və ləyaqət uğrunda qlobal hərəkatın formalaşmasına kömək etdi. Dəyişiklik uğrunda yorulmaz mübariz, 1980-ci illərdəki prezidentlik kampaniyalarından tutmuş milyonlarla insanı seçkilərdə iştirak etmək üçün qeydiyyata almağa qədər səsi eşidilməyənlərin səslərini ucaltdı və tarixdə silinməz iz qoydu”.
Ölümün səbəbi hələlik açıqlanmayıb, lakin noyabr ayında Cekson qan təzyiqini sabitləşdirmək üçün xəstəxanaya yerləşdirilmişdi və proqressiv supranuklear iflic (PSP) - “bədən hərəkətlərinə, yerişə və tarazlığa, eləcə də göz hərəkətlərinə təsir edən nadir nevroloji pozğunluq” səbəbindən müşahidə altında idi.
2017-ci ildə o, Parkinson xəstəliyinə tutulduğunu açıqlamışdı.
8 oktyabr 1941-ci ildə Cənubi Karolina ştatının Qrinvill şəhərində anadan olan Cekson 1960-cı illərdə Martin Lüter Kinqin Cənubi Xristian Liderlik Konfransının liderlərindən biri kimi məşhurlaşmışdı.
1965-ci ilə qədər o, Kinqin Selmadan Montqomeriyə (Alabama) rəhbərlik etdiyi səsvermə hüquqları yürüşünə qoşuldu. 1968-ci il aprelin 4-də Cekson, vətəndaş hüquqları lideri Memfisdəki (Tennessi ştatı) Lorraine motelində güllələndiyi zaman Kinqin yanında idi. Ceksonun sözlərinə görə, Kinq onun qollarında dünyasını dəyişib.
Son illərdə sağlamlıq problemlərinə baxmayaraq, Cekson "Black Lives Matter" hərəkatı dövründə də irqi bərabərsizliyə qarşı çıxış etməyə davam etdi.
Pastor Ceksonun həyat yoldaşı Jaklin, onların övladları – Santita, Cessi-kiçik, Conatan, Yusef, Jaklin, qızı Eşli Cekson, eləcə də nəvələri qaldı.
Almaz Həsənli