Almanların əksəriyyəti Rusiya Federasiyasından sonra ABŞ-ı dünyaya ən böyük təhlükə hesab edir

Allensbah İctimai Rəy İnstitutunun (Institut für Demoskopie Allensbach) Strategiya və Ali Rəhbərlik Mərkəzinin (Centrum für Strategie und Höhere Führung) sifarişi ilə apardığı araşdırmaya görə, Almaniya sakinlərinin demək olar ki, üçdə ikisi (65%) ABŞ-ı yaxın illərdə planetimizdəki sülh üçün ən böyük təhlükə yaradacaq ölkə kimi göstərib. Yanvarın 6-dan 19-dək aparılan araşdırmada 16 yaşdan yuxarı 1077 ölkə sakini iştirak edib. Oxuməni.az-ın “Deutsche Welle”-yə istinadən verdiyi məlumata görə, nəticələr çərşənbə axşamı “dpa” agentliyi tərəfindən paylaşılıb.

Müqayisə üçün qeyd edək ki, 2025-ci ildə analoji suala belə cavab verənlərin sayı Almaniyada yaşayanların 46%-i, 2024-cü ildə isə 24%-i təşkil edib. Bundan əlavə, son sorğu göstərib ki, Almaniya sakinlərinin yalnız 32%-i NATO-nun Avropa üzv dövlətinə hücum olacağı təqdirdə ABŞ-ın hərbi yardım göstərəcəyinə inanır. Buna inanmayan respondentlərin sayı 35%-dir, qalan 33%-i isə cavab verməyib.

Eyni zamanda, sorğuda iştirak edənlərin 81%-i yaxın illərdə dünyaya ən böyük təhlükənin Rusiya tərəfindən gələcəyini bildirib. Ukraynada tammiqyaslı müharibənin başlanmasından bəri respondentlərin 75-82%-i hər il Moskvadan gələn təhlükəni əsas hesab edib. Başqa bir böyük güc olan Çini isə Almaniya sakinlərinin 46%-i dünyaya təhlükə hesab edib.

Almanlar ölkənin qarşıdakı illərdə müharibəyə cəlb olunacağına inanmırlar: Respondentlərin 40%-i belə bir ssenarini "olduqca az ehtimal olunan", 5%-i "çox az ehtimal olunan" və daha 24%-i qərarsız hesab edir. Almaniyada respondentlərin yalnız 3%-i müharibəni "çox ehtimal olunan", 28%-i isə "olduqca ehtimal olunan" hesab edir.

Bununla belə, respondentlərin demək olar ki, yarısı (49%) müharibə başlayacağı təqdirdə Almaniyanı tərk etmək imkanını nəzərdən keçirmədiyini bildirib. Lazım gələrsə, bu variantı araşdırmağa 24%-i hazırdır, daha 14%-i isə artıq bu barədə düşünüb. Sorğuda iştirak edənlərin 13%-i cavab verməyib.

Almaz Həsənli