Tramp öz adı ilə dərmanlara endirimlər təklif edən sayt işə saldı

ABŞ prezidenti Donald Tramp amerikalıların dərmanları daha sərfəli qiymətlərlə ala biləcəyi TrumpRx adlı hökumət saytının istifadəyə verildiyini elan edib. Oxuməni.az xəbər verir ki, bu barədə cümə günü “dpa” agentliyi məlumat yayıb.

Dərmanların birbaşa saytda satılmayacağı, lakin istifadəçilərin reseptli dərmanları tapa biləcəyi və alış zamanı nə qədər qənaət edə biləcəyi qeyd olunur. Dərmanı bu qiymətə almaq üçün kuponu yükləmək və onu tərəfdaş apteklərdən birində təqdim etmək lazımdır. Alternativ olaraq, portal lazımi dərmanı birbaşa istehsalçıdan almaq imkanını göstərir.

Dpa-nın məlumatına görə, sayt istifadəyə verilən zaman orada arıqlama dərmanları da daxil olmaqla 40-a yaxın dərman tapmaq mümkün idi. Lakin jurnalistlər istehlakçıların Donald Trampın vəd etdiyi qədər əhəmiyyətli endirimlər əldə edə biləcəyinə əmin deyillər. Bu arada, bir sıra ABŞ əczaçılıq konsernləri artıq öz məhsullarını TrumpRx saytı vasitəsilə endirimlə təklif etməyə razılaşıblar.

ABŞ dərman satışında ən bahalı bazarlardan biri hesab olunur. Avropa və Asiya ölkələrində bazar tənzimlənməsi, bir qayda olaraq, daha sərtdir və maksimum qiymətlər barədə razılaşmalar mövcuddur.

ABŞ-da uzun müddətdir ki, yüksək yaşayış xərcləri ilə bağlı müzakirələr gedir. Dərmanların qiyməti bu problemin yalnız bir tərəfidir. Bu fonunda Tramp xarici siyasətlə çox məşğul olduğu və amerikalıların daxili problemlərinə az diqqət yetirdiyi üçün tez-tez tənqid olunur.

Almaz Həsənli