Kirğızıstanda cinsiyyətin dəyişdirilməsinə qadağa qoyulması təklif olunur

Sənədin əsas məqsədi dövlət sənədlərində bioloji cinsiyyətin dəyişməzliyini təsbit etmək və onun dəyişdirilməsi prosedurlarını məhdudlaşdırmaqdır.
Qanun layihəsinin ictimai müzakirəsi Joroqorku Keneşin (parlamentin) saytında başlayıb. Layihə Ailə Məcəlləsinə, "Vətəndaşlıq vəziyyəti aktları haqqında" və "Vətəndaşların sağlamlığının qorunması haqqında" qanunlara dəyişikliklər edilməsini nəzərdə tutur. Oxuməni.az-ın məlumatına görə, bu barədə “24.kg” yazıb.
Layihə təsbit edir ki, insanın cinsiyyəti yalnız doğuşda qeydə alınmış bioloji əlamətlərlə müəyyən edilir və bu qeyd vətəndaşın istəyi ilə, tibbi rəylər və ya məhkəmə qərarı əsasında dəyişdirilə bilməz. Yalnız ilkin qeydiyyat zamanı texniki səhvlərin düzəldilməsi üçün istisna nəzərdə tutulur.
Ailə Məcəlləsində ailə münasibətlərinin tənzimlənməsi, nikahın bağlanması və valideynlik hüquqlarının müəyyən edilməsi üçün yeganə icazə verilən kateqoriya kimi bioloji cinsiyyəti müəyyən edən maddənin daxil edilməsi planlaşdırılır. Qanun layihəsinə əsasən, valideynlər uşaqları onların bioloji cinsiyyətinə uyğun olaraq tərbiyə etməlidirlər.
"Vətəndaşlıq vəziyyəti aktları haqqında" qanunda doğum haqqında şəhadətnamədə cinsiyyət qeydinin yekun olduğu və onun hər hansı dəyişdirilməsinin qadağan olunduğu təsbit edilməsi təklif olunur. Yalnız ilkin qeydiyyat zamanı yol verilmiş texniki səhvlərin düzəldilməsi mümkündür.
"Vətəndaşların sağlamlığının qorunması haqqında" qanunda layihə cinsiyyətin dəyişdirilməsinə yönəlmiş tibbi müdaxilələri, o cümlədən cərrahi əməliyyatları və hormonal terapiyanı qadağan edir. İstisnalar yalnız doğuşdan gələn cinsi inkişaf anomaliyalarının müalicəsi üçün nadir hallarda, həkim komissiyasının təsdiqi və məhkəmə qərarı ilə mümkündür.
Qanun layihəsinin müəllifləri qeyd edirlər ki, sənəd ailə dəyərlərinin qorunmasına, hüquqi ziddiyyətlərin qarşısının alınmasına və şəxsi məlumatların uçotunun gücləndirilməsinə yönəlib.
Qanun layihəsi Joroqorku Keneşin saytında yerləşdirilib və ictimai müzakirə üçün açıqdır, bundan sonra baxılması üçün müvafiq parlament komitələrinə təqdim ediləcək.
Almaz Həsənli