Xaricdə yaşayan rusiyalılar yeni vətəndaşlıq və ya yaşayış icazəsi barədə məlumat vermədikləri üçün cərimələnəcəklər

Rusiya Xarici İşlər Nazirliyi yeni vətəndaşlıq və ya yaşayış icazəsi aldıqdan sonra 60 gün ərzində hakimiyyət orqanlarına məlumat verməyən bütün Rusiya vətəndaşları üçün cinayət məsuliyyəti nəzərdə tutan qanun layihəsi hazırlayıb. Oxuməni.az xəbər verir ki, "Vyorstka" nəşri bu barədə məlumat yayıb.

Nazirlik, o cümlədən "Rusiya Federasiyasının Vətəndaşlığı Haqqında" qanunun 11-ci maddəsinə dəyişikliklər edilməsini təklif edir. Mövcud normalara görə, hazırda rusiyalılar yeni vətəndaşlıq və ya yaşayış icazəsi aldıqdan sonra 60 gün ərzində Rusiya Daxili İşlər Nazirliyinə məlumat verməlidirlər, əgər xaricdə olduqları üçün bunu edə bilmirlərsə, Rusiyaya daxil olduqları andan 60 gün ərzində məlumat verməlidirlər.

Bununla yanaşı, rusiyalılar yeni statusları barədə öz yeni ölkələrindəki Rusiya konsulluğuna və ya diplomatik nümayəndəliyinə könüllü şəkildə məlumat verə bilərlər. Bu tədbir hazırda məcburi deyil.

Məlumat verməməyə görə Cinayət Məcəlləsinin 330.2-ci maddəsi ilə cinayət məsuliyyəti nəzərdə tutulur. Pozucuya 200 min rubla qədər cərimə və ya məhkumun bir ilədək müddətdəki gəlirləri məbləğində cərimə tətbiq oluna bilər. Həmçinin ona 400 saata qədər məcburi işlər təyin edilə bilər.

Rusiya Xarici İşlər Nazirliyi vətəndaşları yerindən asılı olmayaraq, yeni statusları barədə Daxili İşlər Nazirliyinə, konsulluğa və ya diplomatik nümayəndəliyə məcburi qaydada məlumat verməyə borclu etməyi təklif edir. Əks halda, rusiyalıları Cinayət Məcəlləsinin 330.2-ci maddəsi ilə cinayət məsuliyyəti gözləyir.

Vətəndaşlıq və yaşayış icazəsi ilə yanaşı, Xarici İşlər Nazirliyi vətəndaşları "Rusiya Federasiyası vətəndaşının xarici dövlətin ərazisində daimi yaşamaq hüququnu təsdiq edən digər sənəd" barədə məlumat verməyə məcbur etməyi təklif edir. Layihədə konkret olaraq hansı sənədlərdən bəhs edildiyi dəqiqləşdirilmir. "Kovçeq" layihəsinin yaradıcısı, hüquqşünas Anastasiya Burakovanın sözlərinə görə, bu, müvəqqəti yaşayış icazəsi (RVP) və D tipli milli viza ola bilər.

Bundan əlavə, nazirlik qanuna yeni bir anlayış – "Rusiya Federasiyasından kənarda daimi yaşayan vətəndaş" əlavə etməyi təklif edir. Bu tərifə xaricdə yaşamağa imkan verən hər hansı bir sənədə – vətəndaşlığa, yaşayış icazəsinə, RVP-yə və D vizalarına malik olan rusiyalılar daxil olacaq. Burakovanın iddiasına görə, bundan əlavə, bir il ərzində altı aydan çox xaricdə yaşayan vətəndaşlar da bu şəkildə təyin ediləcək.

Əgər qanun layihəsi indiki redaksiyasında qəbul olunarsa, 2028-ci il yanvarın 1-dən qüvvəyə minəcək. Əgər o vaxta qədər rusiyalılar yeni vətəndaşlıq və ya yaşayış icazəsi barədə hakimiyyət orqanlarına məlumat verməsələr, bunu bir il ərzində etməli olacaqlar.

Almaz Həsənli