Məhkəmə "Moskva" kreyserinə hücum zamanı 20 nəfərin həlak olduğunu təsdiqləyib

Moskvada yerləşən 2-ci Qərb Dairə Hərbi Məhkəməsi cümə axşamı, 2022-ci ilin aprelində "Moskva" kreyserinin batırılması və "Admiral Essen" freqatına edilən hücumla bağlı iş üzrə hökm çıxarıb. Ukrayna Hərbi Dəniz Qüvvələrinin 406-cı artilleriya briqadasının komandiri Andrey Şubin beynəlxalq terrorizm maddəsi ilə qiyabi olaraq ömürlük həbs cəzasına məhkum edilib. Oxuməni.az-ın məlumatına görə, bu barədə "Deutsche Welle" məhkəmənin press-relizinə istinadən xəbər verir.
Məhkəmənin press-relizindən göründüyü kimi, "Moskva" kreyserinə hücum zamanı 20 ekipaj üzvü həlak olub, daha 24 nəfər yaralanıb, səkkiz nəfər isə itkin düşmüş hesab olunur. Məhkəmənin mətbuat xidmətinin məlumatında deyilirdi ki, dənizçilərin ölümü partlayış, yanğın və tüstülənmə nəticəsində, o cümlədən altı saatdan çox davam edən gəminin sağ qalması uğrunda mübarizə zamanı baş verib.
"Mediozona"nın diqqət yetirdiyi kimi, bu məlumatı ehtiva edən press-reliz dərc edildikdən qısa müddət sonra məhkəmənin saytından silinib. Həmin məlumatda "Admiral Essen" freqatına edilən hücum nəticəsində bir nəfərin yaralandığı da qeyd olunurdu.
Bundan əvvəl Rusiya hakimiyyəti "Moskva" kreyserində həlak olanların sayı barədə rəsmi məlumatlar dərc etməmişdi.
Hadisədən sonra Rusiya Müdafiə Nazirliyi kreyserinin döyüş sursatının partlamasına səbəb olan yanğın nəticəsində batdığını bildirmişdi.
Ukrayna mənbələri gəminin iki "Neptun" gəmi əleyhinə raketlə vurulduğunu iddia edirdilər.
2022-ci ilin payızında Sevastopoldakı məhkəmə, hərbi hissə komandirinin və valideynlərin müraciətləri əsasında "Moskva" kreyserində xidmət edən 17 dənizçinin həlak olduğunu təsdiqləmişdi. Həlak olanlardan bəziləri müddətli hərbi xidmət əsgərləri idi.
Almaz Həsənli