Fransa Aralıq dənizində Rusiyadan gələn bir neft tankerini saxladı

Fransa Hərbi Dəniz Qüvvələri Aralıq dənizində Rusiyadan gələn və beynəlxalq sanksiyaları pozmaqda şübhəli bilinən bir neft tankerini saxladı. Fransa Prezidenti Emmanuel Makron bunu X sosial media platformasında açıqladı.

"Bu səhər Fransa Hərbi Dəniz Qüvvələri Rusiyadan gələn, beynəlxalq sanksiyalara məruz qalan və saxta bayraq istifadə etməkdə şübhəli bilinən bir neft tankerinə mindi", Makron yazıb.

Əməliyyat müttəfiqlərin dəstəyi ilə açıq dənizdə həyata keçirilib və gəmi yönləndirilib. Fransa Prezidentinin sözlərinə görə, bu hərəkət "Ukraynaya qarşı müharibənin maliyyələşdirilməsini asanlaşdıran" sözdə kölgə donanmasının fəaliyyətinə qarşı mübarizə aparmaq məqsədi daşıyır.

15 yanvarda Almaniya Rusiyanın kölgə donanmasının bir hissəsi olduğu düşünülən Tavian neft tankerinin öz sularına girişinə icazə verməyib.

Bundan əvvəl Böyük Britaniyanın Rusiyanın kölgə donanmasına məxsus tankerləri ələ keçirmək üçün xüsusi təyinatlı qüvvələrin şəxsi heyətinə təlim keçdiyi bildirilirdi. London həmçinin Rusiyanın kölgə donanmasına məxsus gəmilərdən müsadirə edilmiş neftdən Ukraynanı maliyyələşdirmək üçün istifadə etmək imkanlarını araşdırır. Qeyd edilib ki, Britaniya bununla Rusiyanı "qanunsuz müharibə mənfəətindən" məhrum etməyə və "Ukraynanın müqavimətini maliyyələşdirməyə kömək etmək" üçün bir yol tapmağa çalışır.

Əziz Mustafa