Hələ ki, heç bir ölkə Qəzza sabitləşdirmə qüvvələrində iştirakını təsdiqləməyib

Hələ ki, heç bir ölkə anklavda sülhü təmin etmək üçün beynəlxalq sabitləşdirmə qüvvələrinin tərkibində işləmək üçün Qəzza zolağına hərbi kontingent göndərməyə hazır olduğunu təsdiqləməyib. Bu barədə Financial Times (FT) qəzeti məlumat yayıb.

Qeyd olunur ki, hələ ki, heç bir ölkə radikal Fələstin HƏMAS hərəkatını zorla tərksilah etmək təşəbbüsünü irəli sürməyib. "Amerikalılar sadəlövhcəsinə inanırlar ki, HƏMAS-ı tərksilah etmədən istənilən problemi həll etməkdə irəliləyə bilərlər. HƏMAS silah məsələsinin həlli üçün hələlik real plan yoxdur", - deyə qəzetin İsrail hökumətinin mövqeyi ilə tanış olan mənbələrindən biri bildirib.

Bundan əvvəl Britaniyanın "The Guardian" qəzeti İndoneziya, Azərbaycan və Türkiyənin Misirin rəhbərlik edəcəyi sabitləşdirmə korpusuna xeyli sayda əsgər göndərəcəyini bildirmişdi. Lakin ölkələr bu təşəbbüsdə iştiraklarını rəsmi olaraq təsdiqləməyiblər.

BƏƏ-nin "The National" qəzeti qeyd edib ki, kontingentin tərkibində ən azı 4000 əsgərin olması gözlənilir. Onların ağır silahları olmayacaq və mandatı sülhməramlı qüvvələrin mandatına bənzəyəcək. Beynəlxalq kontingentin səhra xəstəxanalarının yerləşdirilməsi və vacib infrastrukturun bərpası, eləcə də 3000 yerli könüllü ilə birlikdə dağıntılar altından ölən fələstinlilərin cəsədlərini çıxarmaq üçün axtarış-xilasetmə əməliyyatlarına nəzarət etməsi gözlənilir.

Əziz MUSTAFA