Britaniya Ukraynanı dəstəkləmək üçün dondurulmuş Rusiya aktivlərindən 10,6 milyard dollar verməyə hazırdır
Britaniya hökuməti Ukraynanı dəstəkləmək üçün Böyük Britaniyada dondurulmuş Rusiya aktivlərinin 8 milyard funt sterlinqini (10,6 milyard dollar) köçürməyə hazırdır. Bu barədəThe Times qəzeti məlumat yayıb.
Nəşr bildirib ki, "Nazirlər Ukraynanı dəstəkləmək üçün Böyük Britaniyada dondurulmuş Rusiya aktivlərinin 8 milyard funt sterlinqini köçürməyə hazırdırlar". Nəşrin məlumatına görə, nazirlər Kreml lideri Vladimir Putinin "Birləşmiş Krallığın vətəndaşları, təhlükəsizliyi və rifahı üçün aktiv təhlükə" yaratdığı barədə xəbərdarlıq ediblər.
Buna görə də, Putinə təzyiq göstərmək üçün beynəlxalq səylərin bir hissəsi olaraq, Britaniya AB və Kanada da daxil olmaqla digər ölkələrlə Ukraynanın hərbi ehtiyacları üçün 100 milyard funt sterlinqə qədər vəsait ayıra biləcək bir razılaşma əldə etməyə çalışır.
The Times qəzeti əlavə olaraq qeyd edir ki, bu pul növbəti iki il ərzində Ukraynanın maliyyə ehtiyaclarının üçdə ikisindən çoxunu ödəyəcək. Xüsusilə, sülh razılaşması əldə edilərsə, ya müharibənin davam etməsini, ya da yenidənqurmanı əhatə edəcək.
Məqalədə bildirilir ki, Böyük Britaniyadakı dondurulmuş Rusiya aktivlərindən Ukraynanı maliyyələşdirmək üçün istifadə planları çərşənbə günü Brüsseldə NATO xarici işlər nazirlərinin görüşündə vəsaitlərin ayrılması ilə bağlı danışıqların bir hissəsi olaraq müzakirə edilib.
Xatırladaq ki, Avropa Komissiyası bu yaxınlarda Ukraynaya 140 milyard avro dəyərində "təzminat krediti" təklif edib. Bu, ehtimal ki, Rusiyanın Ukraynaya tammiqyaslı işğalı ilə əlaqədar AB tərəfindən dondurulmuş Rusiya aktivləri ilə təmin ediləcək.
Lakin Kiyevin belə bir "təzminat krediti" alması üçün bütün Aİ üzv dövlətlərinin razılığı tələb olunur. Lakin dondurulmuş aktivlərin ən böyük payına sahib olan Belçika təşəbbüsü əngəlləyir.
Xüsusilə, Belçikanın Baş naziri Bart de Vever belə bir planın ciddi iqtisadi və geosiyasi nəticələrə səbəb ola biləcəyinə inanır.
Bu arada, Belçikanın xarici işlər naziri Maksim Prevost qeyd edib ki, Aİ-nin Ukrayna üçün "təzminat krediti" təklifi onun ölkəsinin tələblərinə cavab vermir.
O, həmçinin əlavə edib ki, ölkə kreditin tətbiqi halında yarana biləcək bütün hüquqi xərcləri digər Aİ üzv dövlətlərindən ödəməsini istəyir.
Bundan əlavə, Belçika, Rusiyanın geri ödəməli olduğu təqdirdə Aİ ölkələrinin lazımi vəsaiti tez bir zamanda ayıracağına dair zəmanət almaq niyyətindədir.
Əziz MUSTAFA
