Cənub-Şərqi Asiyada daşqınlar nəticəsində ölənlərin sayı 250-ni keçib

Son bir neçə gündə İndoneziya, Malayziya və Taylandda baş verən daşqınlar 250-dən çox insanın ölümünə səbəb olub. Bu barədə AFP yerli hakimiyyət orqanlarına istinadən xəbər verir.

Fəlakətin əsas zərbəsi Taylandın cənubuna dəyib. Yerli hakimiyyət orqanları ən azı 145 ölüm hadisəsi barədə məlumat verib. Associated Press (AP) Fəlakətlərin Qarşısının Alınması və Azaldılması Departamentinə istinadən xəbər verir ki, 12 cənub əyalətində 3,6 milyondan çox insan zərər çəkib, 1,2 milyon ev su altında qalıb. Hat Yai şəhərində suyun səviyyəsi 1,5-3 metrə çatıb və şəhər tamamilə təxliyə olunur.

İndoneziya adasının Sumatra bölgəsindəki hakimiyyət orqanları bu həftə ən azı 111 nəfərin öldüyünü, təxminən 100 nəfərin itkin düşdüyünü bildirib. Şimali Sumatra polisinin sözçüsü Ferry Walintukan AFP-yə bildirib ki, təhlükəsizlik qüvvələri qurbanların "təxliyəsinə və yardım göstərməsinə" diqqət yetirir, lakin bəzi ərazilərə giriş məhdud olaraq qalır. Malayziyada daşqınlar nəticəsində iki nəfər ölüb. Perlis əyalətinin şimalındakı bütün ərazilər tamamilə su altında qalıb.

Bölgədəki daşqınlara güclü musson yağışları və tropik fırtına səbəb olub. AFP-nin verdiyi məlumata görə, illik musson mövsümünə baxmayaraq, İndoneziya və Taylandda daşqın qurbanlarının sayı son illərdə ən yüksək göstəricilərdən biri olub.

Əziz MUSTAFA