Xaricdəki türklərlə işlər idarəsinin sədri Azərbaycana səfər edəcək

Türkiyənin xaricdəki türklərlə və qohum icmalarla işlər idarəsinin (YTB) sədri Əbdülhadi Tulus bu gün, noyabrın 27-də Azərbaycana rəsmi səfərlə gələcək. Bu barədə "Yeni Şafak" xəbər verib.
Səfər çərçivəsində Tulus Azərbaycanın dövlət qurumları və ictimai təşkilatlarının nümayəndələri ilə bir sıra görüşlər keçirəcək. İki ölkə arasında əməkdaşlıq perspektivlərinin, birgə layihələrin həyata keçirilməsinin və humanitar əlaqələrin gücləndirilməsinin müzakirəsi gözlənilir.
YTB idarəsi xaricdə yaşayan türk vətəndaşlarının dəstəklənməsi, həmçinin müxtəlif ölkələrdəki qohum və dost icmalarla münasibətlərin inkişafı ilə məşğuldur. Qurum mədəni, təhsil və sosial proqramları əlaqələndirir, "Türkiye Scholarships" proqramı vasitəsilə xarici tələbələrə təqaüdlər verir, mədəniyyətlərarası dialoqu və ümumi tarixi-mədəni əlaqələrin gücləndirilməsinə kömək edir. YTB həmçinin mədəni irsin qorunması, mübadilə tədbirlərinin təşkili, mövzulu forumların keçirilməsi və diasporun dəstəklənməsi üzrə layihələr həyata keçirir.
Əbdülhadi Tulusun səfərinin Türkiyə və Azərbaycan arasında tərəfdaşlıq təşəbbüslərinin genişləndirilməsi, həmçinin humanitar və mədəni sahələrdə qarşılıqlı fəaliyyətin dərinləşdirilməsi istiqamətində növbəti addım olacağı gözlənilir.
Almaz Həsənli