Marko Rubio Vaşinqtonun Ukrayna planını AB rəsmiləri ilə müzakirə edəcək

The Wall Street Journal (WSJ) qəzetinin məlumatına görə, ABŞ Dövlət Katibi Marko Rubio 21 noyabrda Ukraynadakı münaqişənin sülh yolu ilə həlli üçün yeni ABŞ planını Avropa rəsmiləri ilə müzakirə etmək niyyətindədir.

Nəşrin məlumatına görə, eyni zamanda ABŞ-ın Milli Təhlükəsizlik Məsləhətçisi olan Rubio milli təhlükəsizlikdən məsul olan yüksək vəzifəli Avropa rəsmiləri ilə müzakirələr aparacaq.

Nəşr qeyd edir ki, bir neçə yüksək vəzifəli Avropa diplomatı Ukrayna böhranının həlli üçün "hər hansı planla bağlı narahatlıqlarını ifadə etmək imkanı veriləcəyinə" ümid etdiklərini bildiriblər.

Təfərrüatları Qərb mediasına sızdırılan Amerika planına əsasən, ABŞ və digər ölkələr Rusiyanın Krım, Donbas və Ukraynanın güzəştə getməyə məcbur edəcəyi digər ərazilər üzərində suverenliyini tanımalıdırlar. Bunun müqabilində Kiyev Amerika və Avropa təhlükəsizlik zəmanətləri alacaq. Ukrayna qoşunlarının çıxarılacağı ərazilərdə silahsızlaşdırılmış zona yaradılacaq. Axios-un adı açıqlanmayan bir Amerika rəsmisinə istinadən verdiyi məlumata görə, Xerson və Zaporojye bölgələrində münaqişə tərəfləri arasında təmas xətti dondurulacaq və Rusiya bəzi əraziləri Ukraynaya qaytarmağa məcbur olacaq. Ukrayna ordusu əhəmiyyətli dərəcədə azaldılacaq və uzaq mənzilli silahlardan məhrum ediləcək. Plan həmçinin ölkədə xarici qoşunların yerləşdirilməsinə qadağa qoyulmasını və rus dilinə rəsmi status verilməsini nəzərdə tutur. Bloomberg Rusiyaya qarşı sanksiyaların da ləğv ediləcəyini bildirib.

Əziz Mustafa