Şoyquya sui-qəsd cəhdində təqsirləndirilən şəxs başqırd iş adamının qətli ilə əlaqələndirilir

Moskvadakı Troekurovskoye qəbiristanlığında Rusiya Təhlükəsizlik Şurasının katibi Sergey Şoyquya qarşı sui-qəsd cəhdi işində təqsirləndirilən Tacikistan əsilli Cəloliddin Şamsov əvvəllər Başqırdıstan iş adamı Marat Kuptsovun qətlinin təşkilində iştirak edib. Bunu TASS-ın Başqırdıstan Ali Məhkəməsindən əldə etdiyi materiallar sübut edir.

Şamsova qarşı cinayət işi onun davam edən axtarışı səbəbindən ayrıca icraata ayrılıb. Məhkəmə sənədlərinə görə, iş adamının keçmiş gəlini İrina Kuptsova 1,5 milyon rubl borcu səbəbindən qətli təşkil etmək təklifi ilə Şamsova müraciət edib.

Hökmdə deyilir: "Cinayətkar niyyətini həyata keçirmək üçün İ.M. Kuptsova, axtarış səbəbindən cinayət işi ayrıca icraata ayrılmış şəxsə (bundan sonra Ş. adlandırılacaq) qətlin təşkilində onunla əməkdaşlıq etmək təklifi ilə müraciət edib".

Məhkəmə sənədlərinə görə, Şamsov qətl planının hazırlanmasına, cinayətkarların tapılmasına və cinayətə nəzarət etməyə cavabdeh olub. 2019-cu ildə İrina Kuptsova 17 il müddətinə azadlıqdan məhrum edilib, digər üç cinayətkar isə 8 ildən 15 ilə qədər həbs cəzası alıb.

FSB Rusiyanın ən yüksək vəzifəli məmurlarından birinə qarşı sui-qəsdin qarşısını aldığını, lakin onun adını çəkmədiyini açıqlayıb. MK iddia edir ki, Ukrayna kəşfiyyat əməliyyatının hədəfi Sergey Şoyqu olub. Nəşrin məlumatına görə, terror aktı Troekurovskoye qəbiristanlığında məmur qohumlarının məzarlarını ziyarət edərkən planlaşdırılırdı.

Əziz MUSTAFA