Polşa Prezidenti Kommunist Partiyasını qadağan etmək niyyətindədir
Polşa Prezidenti Karol Navrotski ölkənin Konstitusiya Tribunalından Polşa Kommunist Partiyasının (KPP) qanunsuz elan edilməsini istəyib və iddia edib ki, bu qrup keçmiş kommunist rejimi ilə əlaqəli totalitar metodları təşviq etməklə konstitusiyanı pozur.
“Mignews.ua” saytının məlumatına görə, yerli media bu barədə cümə axşamı məlumat yayıb.
Bəyanatda iddia olunur ki, 2002-ci ildə siyasi partiya kimi qeydiyyatdan keçmiş KPP "kommunizmin totalitar metodlarını və təcrübələrini" dəstəkləyir və "hakimiyyət qazanmaq və ictimai siyasətə təsir etmək üçün zorakılıqdan istifadə etməyi" nəzərdə tutur, 1945-ci ildən 1989-cu ilə qədər Polşada hökm sürən sistemin elementlərinə istinad edilir.
TVP World xəbər verir ki, oxşar cəhd 2020-ci ildə o vaxtkı ədliyyə naziri Zbiqnev Ziobro partiyanın ləğvi üçün tribunal qarşısında ərizə təqdim edərkən də edilib.
Lakin, həmin ilin oktyabr ayına təyin olunmuş dinləmə Ziobronun məhkəməyə gəlməməsi səbəbindən qeyri-müəyyən müddətə təxirə salınıb. O, hazırda Macarıstandadır və Polşa prokurorları tərəfindən mütəşəkkil cinayətkar qruplaşmaya rəhbərlik etmək də daxil olmaqla 26 ittiham üzrə axtarışdadır.
Almaz Həsənli
