Aİ Trampı Avropaya qırıcı təyyarələr yerləşdirməyə çağırır

Aİ ölkələri ABŞ prezidenti Donald Trampı Ukraynanı qorumaq üçün Rumıniyaya təyyarələr yerləşdirməyə çağırır. Bu barədə The Times xəbər verir.

Xüsusilə, Avropa hərbi liderləri Amerikanın F-35 qırıcılarının Rumıniyaya yerləşdirilməsini müzakirə edirlər. Rusiyanın təkrar işğalının qarşısını almaq üçün NATO Avropadakı ən böyük hava bazasını burada inşa edir.

Avqustun 18-də Ukrayna prezidenti Vladimir Zelenski və Avropa liderləri ilə görüşü zamanı Donald Tramp Amerika qoşunlarının Ukraynaya yerləşdirilməsi ehtimalını istisna edib, lakin ABŞ-ın təhlükəsizlik zəmanətləri çərçivəsində “hava” dəstəyi verməyə hazır olduğunu bildirib.
Həmin görüşdən sonra İngiltərə, Almaniya, Fransa, Finlandiya və İtaliyanın hərbi liderləri ABŞ-ın Birləşmiş Qərargah Rəisləri Komitəsinin sədri general Den Keynin dəvəti ilə Vaşinqtonda bir araya gələrək ABŞ-ın dəstəyinin maddi-texniki təminatını müzakirə ediblər.

NATO hazırda Rumıniyadakı Mixail Koqalniçeanu aviabazasından Qara dəniz üzərindəki hava məkanında patrul edir. Bu, İraq müharibəsi zamanı ABŞ qüvvələri üçün mərkəz idi.

Rumıniyada yerləşən ABŞ döyüş təyyarələri ilə yanaşı, Avropa ölkələri Ukraynada GPS və kəşfiyyat üçün ABŞ peyklərindən davamlı istifadənin təmin edilməsini istəyir.

Onlar həmçinin ABŞ-dan Rusiyanın hücumlarını dəf etmək üçün “Patriot” və “Nasams” zenit-raket kompleksləri verməsini və Qara dəniz üzərində kəşfiyyat təyyarələrinin uçmasına icazə verməsini istəyirlər. Kral Hərbi Hava Qüvvələri müharibə başlayandan bəri Rivet Joint təyyarələri ilə kəşfiyyat missiyaları həyata keçirir, lakin Boeing uçuşları ABŞ-ın icazəsini tələb edir.

Əziz MUSTAFA