Tramp Orbandan Ukraynanın Aİ-yə daxil olmasına mane olmamasını istəyib

Bazar ertəsi, avqustun 18-də ABŞ prezidenti Donald Tramp Vaşinqtonda Ukrayna prezidenti Vladimir Zelenski və Avropa liderləri ilə görüşdən sonra Macarıstanın baş naziri Viktor Orbana zəng edərək, Ukraynanın Avropa İttifaqına qoşulması ilə bağlı danışıqlara niyə mane olduğunu soruşub. Bu barədə “Bloomberg” xəbər verir.
Qeyd edildiyi kimi, Avropa liderləri Trampdan Ukraynanın Aİ-yə daxil olmasına veto qoymaması üçün Orbana təsirindən istifadə etməyi xahiş ediblər.
Trampla söhbət zamanı Macarıstan da Zelenski və Putinin iştirakı ilə növbəti sammit keçirməyə hazır olduğunu bildirib. Tramp Putin və Zelenski arasında zirvə görüşü, ardınca isə iki lider arasında ABŞ prezidenti ilə üçtərəfli görüş ideyasını dəstəkləyib.
Görüşün yeri və vaxtı hələlik bəlli deyil. “Politico” çərşənbə axşamı bildirib ki, Ağ Ev Budapeştdə Tramp, Putin və Zelenski arasında üçtərəfli görüş keçirməyi nəzərdən keçirir. Putinlə isti münasibətləri olan Orban daha əvvəl Aİ-nin Ukraynaya silah tədarükü cəhdlərinə mane olmağa çalışıb və dəfələrlə anti-Kreml sanksiyalarına qarşı çıxıb.
Nə Ağ Ev, nə də Orban administrasiyası Trampın telefon zəngini şərh etməyib.
Orban çərşənbə axşamı sosial mediada yazıb ki, Ukraynanın Aİ-yə üzvlüyü heç bir təhlükəsizlik zəmanəti vermir, ona görə də üzvlüklə təhlükəsizlik təminatının bağlanması həm yersiz, həm də təhlükəlidir.
Almaz Həsənli