Kanadadan ABŞ-a turist axını azalıb, Meksikadan isə artıb

Kanadalı turistlər 2025-ci ilin birinci yarısında ABŞ-a səfərlərini demək olar ki, 19% azaldıblar, CNBC ABŞ Səyahət Assosiasiyasının məlumatlarına istinadən yazır.

Təşkilat bunun səyahət xərclərinin təxminən 1,9 milyard dollar azalmasına səbəb olduğunu bildirdi. İyun ayında Kanadadan turist axınında xüsusilə nəzərəçarpacaq dərəcədə azalma müşahidə olunub - 26%-dən çox.

Eyni zamanda, ABŞ-a gələn meksikalı turistlərin sayı ilin birinci yarısında illik müqayisədə 12,5%, o cümlədən iyunda 14,8% artaraq Amerika iqtisadiyyatına əlavə təxminən 500 milyon dollar qazandırıb.

Yanvar-iyun aylarında ABŞ-a gələn xarici turistlərin ümumi sayı 3,4% azalıb.

Təşkilatın hesabatında deyilir: "Ümumi iqtisadi narahatlıqlar istehlakçı əhval-ruhiyyəsinə təsir etməkdə davam edir". "Sürətlə dəyişən qlobal mühitdə ABŞ-a beynəlxalq səyahət Kanada istisna olmaqla, əksər ölkələrdə güclü olaraq qalır." Bununla belə, sənaye ekspertləri viza rüsumlarının artırılmasından narahatdırlar ki, bu da turizm sektorunda, xüsusən də 2026-cı il futbol üzrə dünya çempionatı ərəfəsində vəziyyəti daha da gərginləşdirə bilər.

Əziz Mustafa