Fransada məhbus çantada həbsxanadan qaçıb

Fransanın cənub-şərqindəki həbsxanadan 20 yaşlı məhbus cəzasını çəkdikdən sonra sərbəst buraxılan kamera yoldaşının əşyalarının olduğu çantada gizlənərək qaça bilib. Fransanın BFMTV xəbər kanalının məlumatına görə, qaçış hadisəsi ertəsi gün, iyulun 12-də Korba həbsxanasının rəhbərliyi tərəfindən aşkar edilib. Hazırda qaçan şəxsin axtarışları aparılır.

Fransız olan gənc insan alveri və oğurluq da daxil olmaqla bir neçə cinayətə görə cəza çəkirdi və həmçinin mütəşəkkil cinayətkarlıqla əlaqəyə görə istintaq altında idi. O, iyulun 11-də biri azadlığa çıxacaq olan digər iki məhbusla bir kamerada idi.

Hadisə ilə bağlı həbsxana daxili araşdırmalara başlayıb. Onun rəhbəri Sebastien Covel BFMTV-yə bildirib ki, “bu, çox nadir haldır” və “bir sıra ciddi pozuntuları göstərir”. Onun sözlərinə görə, bu pozuntular "səhvlərin yığılmasının" nəticəsidir. Ehtimal olunur ki, Korba həbsxanasında sıxlıq olduğundan həbsxana rəhbərliyi məhbusun qaçmasını hiss etməyib. Həbsxana rəsmisi BFMTV-yə bildirib ki, müəssisə 170% doludur və bu, “açıqcası, işçilərimiz üçün iş şəraitini çox çətinləşdirir”. Qaçışla bağlı araşdırma da aparılır və Rhone Departamentlərarası Milli Polisə (DIPN) həvalə edilib.

Əziz Mustafa