Vladivostokda Aİ-nin Rusiyadakı missiyasının əməkdaşı döyülüb

Vladivostokda Aİ-nin Rusiyadakı missiyasının əməkdaşına hücum edilib — diplomat mayın sonunda döyülüb, “Der Spiegel” mənbələrə istinadən yazır.
Nəşrin məlumatına görə, Aİ-nin Rusiyadakı missiyasının əməkdaşı Vladivostokda ezamiyyətdə olub. Mayın 26-da səhər saat 7 radələrində o, gəzinti üçün oteldən çıxıb. Tezliklə onun yanında bir maşın dayanıb, oradan iki kişi çıxıb. Onlar qadını hədələməyə, daha sonra döyməyə başlayıblar.
Qurbanın adı açıqlanmasa da, onun Rumıniya vətəndaşı olduğu məlum olub. Onu Fransadan olan həmkarı müşayiət edirdi. Onunla birlikdə Avropa İttifaqı ölkələrinin Vladivostokdakı konsulluqlarına baş çəkəcəkdilər. Hücumdan sonra diplomat Rusiyadan çıxarılıb. Onun vəziyyəti dəqiqləşdirilməyib.
Ehtimal olunur ki, bu, Aİ-nin Rusiyadakı missiyasının siyasi və mətbuat departamentinin rəhbəri Joslen Qittonun həmkarıdır. “Mediazona”nın qeyd etdiyi kimi, mayın sonunda o, Uzaq Şərqə səfər edib, Xabarovsk və Vladivostok hava limanlarında yerli telekanalların çəkiliş qrupları və “Siz faşistləri himayə edirsiniz” şüarı ilə plakatlar olan bir neçə onlarla kişi tərəfindən təqib edilib. Yerli hökumətyönlü telekanallar Qittonu guya “rusca olan hər şeyə nifrət edən” “qızıl millətçi” adlandırıblar. Eyni zamanda “Vesti Primorye” diplomatın hərəkətlərinin izləndiyinə eyham vurub.
Avropa Komissiyasının mətbuat katibi Anitta Hipper Vladivostokda avropalı diplomata hücum faktını təsdiqləsə də, baş verənlərin təfərrüatlarını açıqlamayıb. Onun sözlərinə görə, hadisədən sonra Rusiyanın Belçikadakı nümayəndəsi izahat üçün çağırılıb.
Aİ missiyasının əməkdaşına kimin hücum etdiyi dəqiq məlum deyil. Avropalı diplomatlar bunun Rusiya xüsusi xidmət orqanlarının əməkdaşları ola biləcəyindən şübhələnirlər. “Der Spiegel” qeyd edir ki, FSB Rusiyada işləyən Qərb diplomatlarını daim izləyir və xarici diplomatik missiyanın nümayəndəsinə hücum “Rusiya Federasiyası ilə Qərb ölkələri arasında gərgin münasibətlərin gərginləşməsidir”.
Almaz Həsənli