Tramp Suriyanın müvəqqəti prezidenti Əl-Şara ilə görüşüb

ABŞ prezidenti Donald Tramp Suriyaya qarşı sanksiyaların ləğvi barədə açıqlamadan sonra bu Yaxın Şərq ölkəsinin müvəqqəti prezidenti Əhməd əl-Şara ilə görüşüb. ABŞ administrasiyasının rəsmisi çərşənbə günü, mayın 14-də bildirib ki, görüş Ər-Riyadda Trampın bir neçə körfəz ölkəsinin liderləri ilə planlaşdırılan danışıqlarından əvvəl baş tutub.
Bundan əvvəl Ağ Ev bəyan etmişdi ki, görüş mümkün qədər qısa olacaq – sadəcə “salam” demək üçün. "Prezident Səudiyyə Ərəbistanında olarkən sabah Suriya prezidentini salamlamağa razılaşıb", - Ağ Ev sözçüsü bildirib.
Bu, ABŞ və Suriya liderlərinin son 25 ildə ilk görüşüdür. Sonuncu dəfə bu, 2000-ci ildə, ABŞ prezidenti Bill Klinton Suriya hökmdarı Hafiz Əsədlə danışıqlar apararkən baş verib, ondan əvvəl isə onlar 1994-cü ildə görüşüblər, “dpa” yazır.
Ötən axşam Tramp Amerikanın Suriyaya qarşı sanksiyalarını ləğv etmək niyyətində olduğunu açıqlayıb. Dəməşq bu addımı “Suriya xalqı üçün həlledici dönüş nöqtəsi” adlandırıb. Suriya şəhərlərinin sakinləri bu xəbəri sevinclə qarşılayıblar.
Oxuməni.az