Tramp rəsmi olaraq 8 Mayı İkinci Dünya Müharibəsində Qələbə Günü elan etdi

ABŞ prezidenti Donald Tramp rəsmi olaraq 8 may tarixini İkinci Dünya Müharibəsində Qələbə Günü elan edib. Bu barədə mayın 7-də Ağ Evin saytında dərc olunmuş bəyannamədə deyilir.
Tramp daha əvvəl “Truth Social” şəbəkəsində 11 noyabr və 8 may tarixini Birinci və İkinci Dünya Müharibələrində müvafiq olaraq ABŞ-da Qələbə günləri elan edəcəyini yazmışdı. Tramp daha sonra deyib ki, Birləşmiş Ştatlar İkinci Dünya Müharibəsində qalib gəlmək üçün “hər hansı digər ölkədən daha çox iş görüb”.
8 May 1945-ci ildə Nasist Almaniyasının təslim olduğu gün ABŞ-da adətən "Avropada Qələbə Günü" adlandırılır, çünki II Dünya Müharibəsi yalnız sentyabrın 2-də Yaponiyanın təslim olması ilə başa çatdı. Bu gün Avropanın bir çox ölkəsində Qələbə Günü, Avropada Qələbə Günü və ya Avropada İkinci Dünya Müharibəsinin bitməsi günü kimi qeyd olunur. ABŞ-da onun rəsmi statusu yox idi. Trampın fərmanı 8 may tarixini təkcə Almaniya üzərində deyil, İkinci Dünya Müharibəsində qələbə günü kimi qeyd edir.
Bəyanatda qeyd edilir ki, bu gün “dünya tarixində azadlıq qüvvələrinin ən epik qələbələrindən biri olan” nasional-sosializm və faşizm üzərində qələbəni qeyd edir. Bundan sonra ABŞ-ın müharibədə iştirakının təfərrüatları təsvir edilmişdir. "Amerika əsgərlərinin qurbanları olmasaydı, bu müharibədə qalib gəlinməzdi və dünyamız bu gün çox fərqli görünərdi", - Tramp bəyannamədə deyib. Həmçinin qeyd edilir ki, Birləşmiş Ştatlar “öz ölkəsi, azadlığı və Qərb sivilizasiyasının sağ qalması üçün özünü qurban vermiş hər kəsin xatirəsini ehtiramla yad edir”. Bəyanatda həmçinin qeyd olunub ki, Tramp ilk növbədə sülhməramlı kimi tarixə düşmək istəyir.
Almaz Həsənli