ABŞ, Cənubi Koreya və Yaponiyanın diplomatik departamentlərinin rəhbərləri əməkdaşlığı gücləndirmək barədə razılığa gəliblər

ABŞ Dövlət Departamentinin məlumatına görə, ABŞ dövlət katibi Entoni Blinken, Cənubi Koreyanın (KR) xarici işlər nazirləri Ço Tae-Yeol və Yaponiyanın Yoko Kamikava KXDR, Rusiya və Çinlə qarşıdurmada sıx koordinasiyanın vacibliyini müzakirə ediblər.

Üçtərəfli görüş G20 xarici işlər nazirlərinin Rio-de-Janeyroda keçirilən toplantısı çərçivəsində baş tutub.

Dövlət Departamenti Blinkenin sözlərindən sitat gətirib: “Böyük regional çağırışlar, o cümlədən KXDR-in təxribat xarakterli hərəkətləri, eləcə də ÇXR-in getdikcə daha iddialı hərəkətləri fonunda ən yaxın müttəfiqlərimizlə əməkdaşlıq və koordinasiya həmişəkindən daha vacibdir”.

Tərəflər həmçinin Tayvan boğazı regionunda sülhün və sabitliyin qorunması səylərini, Qəzzədəki münaqişəni müzakirə ediblər və bütün qalan Həmas girovlarının azad edilməsi və Fələstin mülki vətəndaşlarına humanitar yardımın artırılmasının zəruriliyini təsdiqləyiblər.

Üç ölkənin nümayəndələri həmçinin Şimali Koreyanın “aqressiv ritorikasını və təxribatlarını” pisləyib və Koreya yarımadasının nüvəsizləşdirilməsinin zəruriliyini bəyan ediblər, Pxenyanın nüvə raket proqramını inkişaf etdirməsinə cavab olaraq üçtərəfli əməkdaşlığı gücləndirmək barədə razılığa gəliblər.

Yonhap yazır ki, Şimaldakı vəziyyətin müzakirəsi “Pxenyanın apreldə Cənubi Koreyada keçiriləcək parlament seçkiləri və noyabrda ABŞ-da keçiriləcək prezident seçkiləri ərəfəsində böyük təxribatlara əl ata biləcəyi qorxusu fonunda baş verib”.
​

Oxuməni.az