Qətər İsrailin xeyrinə casusluq ittihamı ilə edama məhkum edilən hind hərbiçilərini azad edib

Hindistan Xarici İşlər Nazirliyi Qətər məhkəməsinin 2022-ci ildə saxlanılan və daha sonra İsrailə casusluq ittihamı ilə edam cəzasına məhkum edilən səkkiz hind əsgərinin hamısını əfv etdiyini açıqlayıb.

Söhbət Omanda qeydiyyatdan keçmiş özəl şirkət olan "Dahra Global Technologies and Consultancy Services" üçün müqavilə əsasında Dohada işləyən təqaüdçü Hindistan Hərbi Dəniz Qüvvələrinin zabitlərindən gedir. O, Qətərə sualtı qayıqların tikintisi sahəsində konsaltinq xidmətləri göstərib. 2022-ci ilin avqustunda Hindistan Hərbi Dəniz Qüvvələrinin istefada olan zabitləri və şirkətin rəhbəri həbs edilib. Onların hamısının Qətərin sualtı qayıq tikintisi proqramı ilə bağlı məxfi məlumatlara çıxışı var idi və Qətər səlahiyyətlilərinin hesab etdiyi kimi, bu məlumatları İsrailə ötürə bilərdi.

Dahra Global-ın rəhbəri 2022-ci ilin noyabrında həbsdən azad edildi. Ötən ilin oktyabrında məhkəmə səkkiz Hindistan əsgərinin hamısını ölüm cəzasına məhkum edib. Bundan sonra Hindistan Xarici İşlər Nazirliyinin rəhbəri Subramaniyam Caişankar bildirib ki, hakimiyyət edam cəzasına məhkum edilmiş şəxslərin azadlığa buraxılmasına nail olmaq niyyətindədir.

“The Indian Express”in qeyd etdiyi kimi, Hindistanın baş naziri Narendra Modi dekabrın əvvəlində COP28 iqlim sammiti çərçivəsində Qətər əmiri Təmim bin Həməd Əl Tani ilə istefada olan zabitlərin taleyini müzakirə edib. Məhz bu görüş dekabrda apellyasiya məhkəməsinin bütün müttəhimlər üçün ölüm cəzasını uzunmüddətli həbs cəzası ilə əvəz etməsinə səbəb oldu. İndi hərbçilərə qarşı bütün ittihamlar götürülüb. Onlardan yeddisi artıq Hindistana gəlib, səkkizincisinin isə yaxın günlərdə geri dönəcəyi gözlənilir.

Oxuməni.az