Polşada rus casus şəbəkəsinin 14 üzvü mühakimə olunub

Lüblin rayon məhkəməsi Ukrayna, Belarus və Rusiyanın 14 vətəndaşını Rusiyanın xeyrinə casusluqda ittiham edib. RMF dekabrın 19-da bildirib ki, bunlar Ukrayna, Belarus və Rusiya vətəndaşlarıdır.

Məhkum edilmiş Ukrayna vətəndaşları arasında: Poltavadan 19 yaşlı Boqdan S., Xersondan 19 yaşlı Artem A., Melitopoldan 23 yaşlı Dmitri S., Nikolayevdən 33 yaşlı Roman Z. , Krivoy Roqdan 18 yaşlı Rostislav K., 29 yaşlı Andrey P. və 26 yaşlı Aleksey P., Vinnitsadan 24 yaşlı Vadim M., 44 yaşlı Yaroslav B. Dolinadan və Dubnodan olan 17 yaşlı Boqdan K. var.

Məhkəmə Minskdən olan iki belarusluya da hökm çıxarıb: 39 yaşlı Mixail A. və 19 yaşlı tələbə Mariya M., həmçinin Rusiyadan olan 20 yaşlı xokkeyçi Maksim S.-yə 6 ilə qədər həbs cəzası verilib.

Hakim Yaroslav Kovalski hökmü əsaslandırarkən deyib ki, bütün müttəhimlər casusluq cinayəti törətməkdə, bir çox hallarda isə mütəşəkkil cinayətkar qrupun tərkibində fəaliyyət göstərməkdə ittiham olunublar. Şübhə yoxdur ki, təqsirləndirilən şəxslər maddi mənfəət üçün hərəkət ediblər.

Prokurorun ittiham aktında yazdığı kimi, müttəhimlər xarici kəşfiyyat fəaliyyətlərində, yəni Rusiya Federasiyası FSB-nin 5-ci Əməliyyat İnformasiya və Beynəlxalq Əlaqələr Xidmətinin Polşa Respublikasına qarşı yönəlmiş fəaliyyətlərində iştirak ediblər.

Məhkəmənin fikrincə, müttəhimlər Telegram mesajlaşma proqramı vasitəsilə "özünü Andrey, Andrzej və ya Qabriel K kimi təqdim edən naməlum şəxs"dən, eləcə də bir neçə fərqli ləqəbdən istifadə edən başqalarından göndərilən əmrlərə əməl ediblər.

"Qrupun fəaliyyətinə nəzarət edən Andrey Polşa və Ukraynada hərbi nəqliyyatı olan qatarı relsdən çıxarmağı planlaşdırıb. Bunun üçün o, qrup üzvləri arasında və bu qrupdan kənarda mükafat üçün bu vəzifəni öhdəsinə götürəcək insanları axtarıb”, - deyə ittihamda bildirilir.

Qrupun ayrı-ayrı üzvləri digər işlərlə yanaşı, kameralar üçün hissələrin alınması, SİM kartların alınması və qeydiyyatı, telefondan istifadə edərək seçilmiş obyektlərin müşahidəsi və qeydə alınması, qatarlarda GPS ötürücülərinin quraşdırılması, kurator tərəfindən verilən tapşırıqları yerinə yetirəcək şəxslərin işə cəlb edilməsi ilə məşğul olublar.

Oxuməni.az