Sərhədin bağlanması səbəbindən təkcə Ukrayna deyil, Polşanın özü də əziyyət çəkir

Polşa hökuməti ilə sərhədin açılması və kompromislərin tapılması məsələsi ilə bağlı danışıqlar davam edir və müəyyən nəticələr verir. Bunu Ukraynanın Polşadakı səfiri Vasili Zvariç dekabrın 4-də “Ukrinform”a açıqlamasında bildirib.

"Biz həqiqətən ümid edirik ki, etirazçılar üçün Polşa hökuməti ilə birlikdə hazırladığımız bu təkliflər etirazı dayandırmaq üçün kifayətdir", - Zvariç bildirib.

O vurğulayıb ki, hər etiraz günü təkcə Ukrayna iqtisadiyyatına deyil, həm də Polşa və digər ölkələrin biznesinə böyük ziyan vurur. Onun fikrincə, sərhəddə hərəkətin məhdudlaşdırılması ilə bağlı aksiyaların davam etdirilməsi üçün heç bir əsas yoxdur.

"Biz polşalı etirazçıları narahat edən bütün məsələləri danışıqlar masası arxasında həll edə bilərik. Lakin biz onları da xoşməramlı görmək istəyirik ki, problemlər daha da gərginləşməsin, həll olunsun", - diplomat bildirib.

Zvariç qeyd edib ki, beynəlxalq yük daşımaları üçün icazə tələbləri Aİ-nin səlahiyyətindədir, ona görə də bunu Brüssellə birlikdə müzakirə etmək lazımdır.

Zvariç sərhəd məsələsinin kompleks şəkildə həll edilməli olduğu fikrini bildirib. Onun sözlərinə görə, ilk növbədə, ötürmə qabiliyyətinin genişləndirilməsi yeni keçid məntəqələrinin açılması və infrastrukturun inkişafı hesabına baş verməlidir.

Oxuməni.az