Avropa İttifaqı Rusiyaya qarşı yeni sanksiyalara hazırlaşır
Avropa İttifaqının Rusiyaya qarşı sanksiyalarının 12-ci paketinə dair təkliflər ümumi dəyəri təxminən 5 milyard avro olan malların ticarətinə məhdudiyyətlər nəzərdə tutur. Bu barədə Bloomberg yazıb.
Media həmsöhbətlərinin sözlərinə görə, yeni paket hərbi məqsədlər üçün istifadə olunan qaynaq maşınları, kimyəvi maddələr və digər texnologiyaların ixracına məhdudiyyətləri nəzərdə tutur.
O, həmçinin proqram təminatı lisenziyalarının qadağan edilməsini və az miqdarda emal olunmuş metalların və alüminium məmulatlarının, tikinti materiallarının, nəqliyyatla əlaqəli malların və almazların idxalını məhdudlaşdırmağı nəzərdən keçirir.
Bloomberg aydınlaşdırır ki, brilyantların idxalına qoyulan qadağa “Yeddilik” qrupunun yaxın gələcəkdə qəbul edilməsi gözlənilən onların izlənilməsi və nəzarəti mexanizmi ilə bağlı qərarından asılı olacaq.
Materialda deyilir ki, Avropa İttifaqı Rusiyanın sanksiyalardan yayınmasına qarşı mübarizəyə xüsusi diqqət yetirəcək.
Aİ, digər məsələlərlə yanaşı, Rusiya ərazisindən daha çox malın tranzitinə qadağa qoya və buna məhəl qoymayan üçüncü ölkələrdəki şirkətləri qara siyahıya sala bilər.
Avropa Komissiyası, qiymət məhdudiyyətləri fəaliyyətini dayandırdığı üçün Rusiya neftinə qarşı sanksiyaların gücləndirilməsi mexanizmlərini də müzakirə edir. Söhbət Rusiya Federasiyasının "kölgə donanması" ilə mübarizədən və Rusiya qara qızılının daşınması sxemində iştirak edən gəmilərə qarşı mümkün məhdudiyyətlərdən gedir.
Nəticədə, Aİ-nin Rusiyaya qarşı yeni sanksiyalar paketinə 100-dən çox fiziki və 40 hüquqi şəxs daxil ola bilər.
Əziz Mustafa
