Fransa Niger qarşısında təslim olur
Fransa iyulun sonunda hərbi çevrilişin baş verdiyi Nigerdən qoşunlarını 2023-cü ilin sonuna qədər çıxaracaq. Leparisien xəbər verir ki, bunu Fransa prezidenti Emmanuel Makron deyib.
“Biz Nigerdə hərbi əməkdaşlığımızı dayandırırıq. Orada yerləşdirilən əsgərlər də ilin sonuna qədər geri qayıdacaq” deyən dövlət başçısı Fransa əsgərlərinin Saheldə islamçı qruplara qarşı həyata keçirdiyi “Barkhane” əməliyyatının “uğurlu” olduğunu bildirib.
Makron Fransa ordusunun çıxarılmasının “mütəşəkkil şəkildə” həyata keçiriləcəyini vəd edib və Fransa səfirinin Nigerdən geri çağırılması qərarını da açıqlayıb.
Nigerdə çevriliş iyulun 26-da baş verib. Hakimiyyəti prezident qvardiyasından bir qrup hərbçi ələ keçirdi, daha sonra silahlı qüvvələrin komandanlığı üsyançılara qoşuldu. Onlar özlərini Vətənin Qurtuluşu Milli Şurası adlandırırdılar. Yeni hakimiyyət hakimiyyətdən devrilmiş prezident Mohamed Bazoumu dövlətə xəyanət və dövlətin təhlükəsizliyinə xələl gətirmək ittihamı ilə mühakimə etmək qərarına gəlib və müdaxilə etsələr, onu öldürəcəkləri ilə hədələyiblər.
Əziz Mustafa
