Türkmənistan və Macarıstan qaz tədarükü ilə bağlı siyasi saziş imzalayıblar

Budapeşt və Aşqabad türkmən qazının Macarıstana tədarükü ilə bağlı siyasi saziş imzalayıblar.

Bu barədə “İnterfaks” məlumat yayıb.

“Türkmənistanın siyasi iradəsi və siyasi niyyəti tam aydındır ki, Macarıstan türkmən qazının Avropaya potensial tədarükü istiqamətlərindən biri və tranzit ölkələrdən birinə çevrilsin. Siyasi razılaşma bağlanıb, indi növbə şirkətlərin kommersiya danışıqlarını davam etdirməkdədir”, o, bazar günü sosial şəbəkələrdə yayımlanan videomüraciətində bildirib.

Türkmənistan prezidenti Serdar Berdiməhəmmədov bazar günü Budapeştdə Macarıstanın baş naziri Viktor Orban ilə görüşüb. Macarıstanın MTI agentliyinin məlumatına görə, söhbət təkcə enerji deyil, həm də səhiyyə, əczaçılıq sənayesi, kənd təsərrüfatı, qida sənayesi, su təsərrüfatı, eləcə də təhsil və mədəniyyət sahələrində əməkdaşlığın genişləndirilməsindən gedirdi.

Türkmənistanın rəhbəri Macarıstanın əsas dövlət bayramı - Müqəddəs Stefan Günü ilə bağlı tədbirlərdə iştirak etmək üçün bazar günü Orbanın dəvəti ilə Budapeştə işgüzar səfərə gəlib.

Macarıstanın paytaxtında keçirilən atletika üzrə dünya çempionatının fəxri qonaqları arasında Berdiməhəmmədov da olacaq.

Türkmənistan Dövlət Xəbər Agentliyinin məlumatına görə, avqustun 20-də Budapeştdə işgüzar səfərdə olan Türkmənistan prezidenti Serdar Berdiməhəmmədov və Macarıstanın baş naziri Viktor Orban arasında ikitərəfli tərəfdaşlığın inkişafı məsələləri müzakirə olunub.

Əməkdaşlığın perspektivli istiqamətləri arasında energetika, nəqliyyat, sənaye, əczaçılıq, kənd təsərrüfatı və bir sıra digər sənaye sahələri müəyyən edilib.

Bununla yanaşı, danışıqlarda Türkmənistan-Macarıstan humanitar əlaqələrinin genişləndirilməsinə də böyük önəm verilib. Bu xüsusda qeyd olunub ki, idman sahəsində qarşılıqlı faydalı təmasların təşviqi də ənənəvi ikitərəfli münasibətlərin məzmununun zənginləşməsinə öz töhfəsini verəcək.

Əziz Baş Göynüklü