Nazir Şəkidə vətəndaşları qəbul edib
Mədəniyyət və turizm naziri Əbülfəs Qarayev Şəkidə vətəndaşları qəbul edib.
Şəki Olimpiya İdman Kompleksində keçirilən qəbulda Şəki ilə yanaşı, Qax, Ağdaş, Bərdə, Tərtər və Zaqatala rayonlarından da vətəndaşların müraciətləri dinlənilib. Mədəniyyət və Turizm nazirliyinin məsul işçilərinin də iştirak etdiyi qəbulda 20-yə yaxın vətəndaşın problemləri araşdırılıb, eləcə də, onların fikir və təklifləri dəyərləndirilib. Müraciətlər əsasən işlə təminat, turizm, qədim abidələrin mühafizəsi, mədəniyyət ocaqlarının təmiri və bərpası və bu sahədə yaranan kadr çatışmazlığı ilə bağlı olub.
Əbülfəs Qarayev qəbulda iştirak edən hər bir vətəndaşın səsləndirdiyi məsələnin diqqətlə baxılıb araşdırılması və problemlərin vaxtında və qanunvericiliyə uyğun şəkildə həll olunacağını deyib. Müvafiq strukturların rəhbərlərinə vətəndaşları narahat edən məsələlərin araşdırılması tapşırılıb. Bəzi məsələlər yerindəcə həllini tapıb. Nazirliyin səlahiyyətinə aid olmayan məsələlər isə aidiyyatı qurumlara çatdırılması üçün qeydiyyata alınıb.
