“Odisseya” Universal tarixində ən çox gəlir gətirən film oldu

Kristofer Nolanın “Odisseya” filmi Universal Pictures tarixində ən çox gəlir gətirən ekran əsərinə çevrilib. Film dünya üzrə prokatda təxminən 1,68 milyard dollar toplayaraq, studiyanın əvvəlki rekordçusu olan 2015-ci il istehsalı “Yura dövrünün dünyası” (1,67 milyard dollar) filmini geridə qoyub. Oxuməni.az xəbər verir ki, bu barədə Variety məlumat yayıb.

Mett Deymonun baş rolda çəkildiyi film, həmçinin R reytinqli (17 yaşdan yuxarı) ekran əsərləri arasında dünya prokatında ən çox gəlir gətirən film kimi rekord vurub. Əvvəllər bu nəticə “Dedpul və Volverin” filminə məxsus idi.

Kassa uğurunun əsas hərəkətverici qüvvələrindən biri premium formatlar olub. Hələ avqust ayında “Odisseya” “Avatar”ın nəticəsini üstələyərək IMAX tarixində ən çox gəlir gətirən filmə çevrilmişdi. Gəlirlərin əhəmiyyətli bir hissəsi Nolanın genişmiqyaslı layihəsinin təşviqi üçün xüsusilə fəal şəkildə istifadə olunan premium formatlardakı nümayişlərdən əldə edilib.

Nolan üçün “Odisseya” karyerasında dünya üzrə ən çox gəlir gətirən film olub. Ekran əsəri dünya prokatındakı ilk həftəsonu nəticələrinə görə təxminən 264 milyon dollar toplayaraq rejissorun karyerasında ən yaxşı startı nümayiş etdirib. Film premyeradan bir ay keçməmiş 1 milyard dollar həddini aşıb və uzunmüddətli prokat, eləcə də beynəlxalq nümayişlər sayəsində gəlirlərini artırmağa davam edib.

Almaz Həsənli